Бу кыһын Мииринэй оройуоннааҕы суута Айхал бөһүөлэгин икки олохтооҕор бириигэбэр таһаарбыта. Бииригэр киһини соруйан өлөрбүтүн иһин, иккиһигэр киһи доруобуйатыгар орто ыарахан эмсэҕэлээһини оҥорбутун иһин.
Маны таһынан, эрдэттэн киксибит бөлөҕүнэн, сэби-сэбиргэли туттан халааһын иһин.
Суут быһаарбытынан, бу саас, муус устарга, Т. диэн киһи С. диэн билэр киһитинээн арыгылыы олорон, ойоҕун урукку эригэр күнүүлүүрүн туһунан кэпсээбит. Күнүүтэ күүһүттэн ол эрэйдээҕи кырбыырга диэн этии киллэрбит. Биирэ онно сөбүлэһээччи буолбут.
Уонна ол киһилэрин көрсөн, дэлби кырбаабыттар. Маныаха С. кырбаммыт киһиттэн ювелирнай киэргэлин устан ылбыт. Оттон Т. өлөрөр санаалааҕын С.-тан эрдэ кистээн, ол былаанын толорон, эмсэҕэлээччини 7-тэ быһаҕынан анньан, миэстэтигэр өлөрбүт.
Суут Т.-вы 9 сылга кытаанах эрэсиимнээх холуонньаҕа, онтон С.-вы 5 сылга көс-холуонньаҕа көҥүллэрин быһарга уурбута.
СӨ Борокуратууратын пресс-сулууспата иһитиннэрбитинэн, сууттанааччылар уонна кинилэр адвокаттара ити бириигэбэргэ сөбүлэспэккэ, СӨ Үрдүкү суутугар апелляционнай үҥсүү түһэрбиттэр (ааһыммыттар).
Ахсынньы 18 күнүгэр СӨ Үрдүкү суутун холуобунай дьыалаларга кэллиэгийэтэ ол апелляцияны көрөн, Мииринэй суутун бириигэбэрин оннунан хаалларбыт. Онон, бириигэбэр сокуоннай күүһүгэр киирбит.
Биһиги корр., «Саха сирэ» хаһыат, edersaas.ru
Хаартыска: интэриниэттэн.