Биэнсийэ пуондата биэнсийэлээхтэри көмпүүтэргэ үөрэтэр бырагыраамалаах. Ону тэҥэ Сибээс министиэристибэтэ биэнсийэлээхтэри босхо үөрэтэр куурустары тэрийдэ.
edersaas.ru
Сүүрбэччэ сыллааҕыта көмпүүтэр диэни билбэт, күннээҕи олохпутугар туттубат этибит. Билигин көмпүүтэрэ, интэриниэтэ суох киһи элбэҕи сүүйтэрэр, олохтон хаалар. Интэриниэттээх буоллаххына, дьиэҕэр олорон эрэн, араас докумуоҥҥун оҥорторуоххун, ыспыраапкалары ылыаххын, хомунаалынай хаһаайыстыба төлөбүрүн, хапытаалынай өрөмүөн пуондатын усунуоһун төлүөххүн, үөрэнээччи электроннай сурунаалын көрүөххүн, аадырыһы көрдөөн булуоххун, чэпчэки сыаналаах табаар атыылаһыаххын, онтон да атыны, элбэҕи оҥоруохха сөп. Бу барыта бириэмэни харыстыыр, олоҕу судургутутар. Онон көмпүүтэри, интэриниэти баһылааһын – кэм ирдэбилэ.
Эдэр уонна орто саастаахтар саҥаттан саҥа уларыйыылары түргэнник ылынан иһэр буоллахтарына, саастаах дьон “сатыахпыт суоҕа” диэн санааттан кэтэмэҕэйдииллэр, саарбахтыыллар. Оттон, дьиҥинэн, саастаах да дьон үөрэннэхтэринэ, кимнээҕэр сатыыр буолаллар.
Бэс ыйын 18 күнүттэн Сибээс министиэристибэтигэр биэнсийэлээхтэри көмпүүтэргэ үөрэтэр куурустар саҕаланыахтара. Кинилэри М.К. Аммосов аатынан ХИФУ математика, информатика институтун «IT-старт» диэн тутар этэрээтин чилиэннэрэ үөрэтиэхтэрэ.
Ол курдук, көмпүүтэри сатыырга, Word, Excel, Power Point бырагыраамалары, интэриниэти, электроннай өҥөлөрү сатаан туһанарга үөрэтиэхтэрэ. Куурус 5 күннээх, сарсыарда 10-тан икки чаас устата буолар.
Билиҥҥи кэмҥэ үгүс муниципальнай өҥө электроннай көрүҥҥэ көһөн эрэр. Холобур, пааспары оҥорторуу Элбэх өҥөнү оҥорор киин (МФЦ) уонна СӨ судаарыстыбаннай уонна муниципальнай өҥөлөрүн порталын (www.e-yakutia.ru) эрэ нөҥүө оҥоһуллар буолла.
Көмпүүтэргэ үөрэниэн баҕалаахтар 49-68-34 уонна 50-61-16 төлөпүөннэринэн билсиэхтэрин сөп.
Ангелина Васильева, “Саха сирэ” хаһыат, edersaas.ru