Олунньу ыйга бытарҕан тымныыбыт ааһан, хойуу туман дьалбарыйан, “һуу” гына түспүт курдук буоллубут. Ону тэҥэ, күммүт уһаабыта, сырдаабыта эмиэ биллэр. Дьэ, төһө уһаабыт эбитий?
Саамай кылгас күҥҥэ – ахсынньы 22 күнүгэр Күн сарсыарда 9 чаас 47 мүнүүтэҕэ тахсар, күнүс 2 чаас 54 мүнүүтэҕэ киирэр эбит. Күн уһуна – 5 чаас 7 мүнүүтэ. Бу кэмтэн “кутуйах хаамыытынан” (биирдии-иккилии мүнүүтэнэн) уһаан киирэн барар. Саҥа Дьылга күн уһуна 5 чаас 17 мүнүүтэҕэ тэҥнэспит.
Олунньу 4 күнүгэр Күн 8 чаас 41 мүнүүтэҕэ тахсар, күнүс 4 чаас 31 мүнүүтэҕэ киирэр эбит. Күн уһуна — 7 чаас 50 мүнүүтэ. Ол аата билигин күммүт 2 чаас 43 мүнүүтэнэн уһаабыт.
Мантан саас өссө сырдаан, сылыйан иһиэҕэ. Күн аайы биэстии-алталыы мүнүүтэ эбиллэн, олунньу 6 күнүгэр лоп курдук 8 чаас 1 мүнүүтэ уһуннаах буолуоҕа.
Хоту дойдуга тохсунньу бүтэһигэр күннэрэ тахсан, кыратык кылатан көрөн баран, үөһэ тэмтэйдэр тэмтэйэн иһэр. «Күнү көрсүү» бырааһынньыгын бэлиэтээн, сүрэхтэргэ үөрүү-көтүү, сааскыны кэтэһии олохсуйар.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru