«Көмөҕө тахсар кыргыттар» батсаап бөлөҕө — бастыҥ холобур

Бөлөххө киир:

Таатта улууһун Ытык Күөлүн олохтоохторо киһи киэн туттар патриот дьоно буолалларын өссө төгүл итэҕэттилэр.

Бэҕэһээ киэһэ 10 чаас саҕана «Көмөҕө тахсар кыргыттар» диэн батсаапка бөлөх тэрийэн, ким баҕалаах кыргыттар төрөөбүт Ытык Күөллэрин уоттан быһыырга сананан түмсүбүттэрэ. Күн бүгүн бөлөххө 69 кыыс, дьахтар аймах баар.

Бу киэһэ баһаартан кэлэн: «Буочахай карьерыгар баар просекаҕа 200 миэтэрэ уһуннаах сиргэ кыһыл илиинэн мас соһуута, ыраастааһына буолла. Кыргыттар сарсын көһүйэн тураллара буолуо. Бары тахсан хас эмит сиринэн үлэлии сылдьарбыт наһаа үчүгэй! Дойдубут туһугар бары биир санаанан!» диэн суруйдулар уонна видеоларын ыыттылар.

«Буруо төһө хойуунуй? Тугу үлэлиигитий?» диэн ыйыппыттарыгар: «Эр дьон уоту эккирэтэн бара тураллар, биһиги кэннилэриттэн хаалан, харабыллаан ситэри умуруоран биэрэбит. Уот ааспытын кэннэ траншеяны ааспатын диэн кэтээһин эбит«, — диэн хоруйдаатылар.

«Хата тыал атын сиргэ үрэн, буруоҕа тумнастыбатыбыт«, диэн эмиэ суруйаллар. «Сарсын Буочахайга утары отжиг ыыталар. Күүс барыта онно барар быһыылаах. Кыргыттар бакаа кэлимэҥ диэтилэр. Наада буоллаҕына биллэриэхтэрэ. Оччоҕуна бары тута барарга бэлэм буолабыт!» — диэн салайааччылара суруйбутугар, бары бэлэмнэрин биллэрэ оҕустулар.

«Бүгүн баһаарга сылдьааччыларга ас бөҕөтө кэллэ. Ас кэлэрэ наһаа үчүгэй. Олох киһи аччыктыыр. Кыһанан астаабыт астара минньигэһэ. Тыаҕа хааман сылайан баран аһыыр олус бэрт!» — диэн ас астааччыларга махтал тылларын эттилэр.

Ити курдук, «Көмөҕө тахсар кыргыттар» батсаап бөлөх тэриммит төрөөбүт Таатталарыгар бэриниилээх кыргыттар бүгүн бастыҥ холобуру көрдөрдүлэр.

Елена ПОТОЦКАЯ, «Саха сирэ» хаһыат.

Хаартыска, видео «Көмөҕө тахсар кыргыттар» батсаап бөлөхтөн.