Сайыҥҥы спортивнай күрэхтэһиилэртэн ордук умсугутуулааҕа, ыарахана Олоҥхо ыһыаҕар саха многоборьетыгар — ыстаныыга, хапсаҕайга, мас тардыһыытыгар ыытыллар күрэхтэһиилэр. Олоҥхо ыһыаҕын кыайыылааҕын аатын сүгэр туһугар, Саха сирин бастыҥ спортсменнара кыһыны быһа анаан бэлэмнэнэллэр. Быйыл Олоҥхо ыһыаҕа Алдаҥҥа ыытылынна. Күрэхтэһии түмүгүн саас-сааһынан билиһиннэрэбит.
Рустам Ксенофонтов Уйбаан Белолюбскайы ситтэ
“Эр Бэрдэ” күрэхтэһиигэ Саха сирин муҥутуур күүстээхтэрэ, модьу боотурдара киирсэллэр. Бу күрэхтэһии көрүҥнэрэ да олоҥхо бухатыырдарыгар анаммыт курдуктар. Ол курдук, Land Cruizer массыынаны соһуу, Алдан таастарын быраҕыы, бэрэмэдэйдээх сүүрүү уонна таас көтөҕүүтэ. Күрэхтэһиигэ кыттыбыт 13 боотуртан муҥутуур кыайыылааҕынан Сунтаар боотура Рустам Ксенофонтов таҕыста уонна Эр Бэрдэ күрэхтэһии биэс төгүллээх кыайыылааҕынан ааттанна. Санатан эттэххэ, кини “Эр Бэрдэ” күрэхтэһиигэ түөртэ кыайбыт Уйбаан Белолюбскайы ситтэ. Рустам сабыс саҥа “ekonic mators” матасыыкылынан наҕараадаланна.
Ыстаныы
Хас ыһыах аайы ырааҕы ыстаныы күрэхтэһиитэ баар. Ол эрэн, “Сэттэ төгүл үс” курдук ыарахан ыстаныы Олоҥхо ыһыаҕар эрэ ыытыллар. Сэттэ төгүл үс диэн тугуй диир буоллаххытына, күрэхтэһээччи сэттэтэ кылыйар, сэттэтэ буурдуур уонна үргүлдьү сэттэтэ куобахтыыр. Бу көрүҥҥэ Нам улууһуттан сылдьар национальнай ыстаныыга Саха Өрөспүүбүлүкэтин спордун маастара Владислав Попов 77 миэтэрэ 94 см ойон, бастакы миэстэ буолла. Оттон XX-с Манчаары оонньууларын муҥутуур кыайыылааҕа Иван Пестряков 76 миэтэрэ 60 сантымыатыры түһэн, иккис миэстэҕэ таҕыста. Үһүс миэстэҕэ 76 миэтэрэ 37 сантымыатыр көрдөрүүлээх Айаал Иванов үһүстээтэ. Кэрэ аҥаардар “Үс төгүл үс” ыстанан куоталастылар. Светлана Макарова 25 миэтэрэ 98 сантымыатыр түһэн, бастаата. 24 миэтэрэ 81 см көрдөрүүлээх Илона Винокурова иккис буолла. 20 миэтэрэ 96 см ойон, Екатерина Лебедева үһүс миэстэҕэ тигистэ.
Баппаҕай иннин биэрбэтэ
Мадьынылар истэригэр ыйааһыныттан тутулуга суох киирсии буолла. Үөһээ Бүлүүгэ ыытыллыбыт XX Манчаары оонньууларын мас тардыһыытыгар муҥутуур кыайыылааҕа Эрчим Баппаҕай бу да сырыыга иннин биэрбэтэ.
Былатыан хапсаҕайга бастакы
Былырыын Олоҥхо ыһыаҕын хапсаҕайыгар Бүлүү бөҕөһө Дмитрий Акимов Увар Тимофеев, Семен Семенов курдук ааттаах спорсменнары охтортоон бастаабыта. Оттон быйыл Саха сирин биир бастыҥ хапсаҕайдьыта, Үөһээ Бүлүү бөҕөһө Былатыан Саввинов Олоҥхо ыһыаҕын түһүлгэтигэр күннээтэ. Кини финалга 100-тэн тахса киилэлээх Нам бөҕөһүн Виталий Тимофеевы кыайан, күрэхтэһии муҥутуур кыайыылааҕынан таҕыста. Үһүс миэстэҕэ Саха Өрөспүүбүлүкэтин көҥүл тустууга сүүмэрдэммит хамаандатын чилиэнэ, быйылгы “Хапсаҕай ыһыаҕын” муҥутуур кыайыылааҕа Евгений Алексеев буолла.
Рустам Ксенофонтов, “Эр бэрдэ” күрэхтэһии биэс төгүллээх кыайыылааҕа:
— Быйыл “Эр бэрдигэр” тохсус кыттыым. Бэлэмим үчүгэй буолан, 5 көрүҥтэн 4-гэр бастаан кыайыылаах буоллум. Сыл аайы утарсааччыларым сайдан, уопутуран иһэллэр. Бу күрэхтэһиигэ хара күүстээх эрэ буолбакка сымса, түргэн буолуохха наада. Хас биирдии көрдөрүү сыллааҕы үлэ түмүгэ. Элбэх сыранан кэлэр. Көрдөрүүбүттэн астынным. Быйыл Алдантан элбэх киһи кыттыбыта үөрдэр.
Николай ПОПОВ, «Саха сирэ» хаһыат, edersaas.ru