Коронавирус дьаҥын кутталыттан Уус Маайа улууһа харыстанар, сэрэтэр дьаһаллары тэринэр.
edersaas.ru
Ол курдук, бары тэрилтэлэргэ сэрэтэр дьаһаллар ылылыннылар, улуус таһыгар командировкалар тохтотулуннулар, маассабай дьаһаллар көһөрүлүннүлэр, сорохторо кэтэхтэн ыытыллаллар. Кииннэммит бухгалтерия уонна үп-казначейство управлениета сылдьааччы ахсаанын хааччахтаатылар, Дьарыктаах буолуу киинэ, култуура тэрилтэлэрэ, улуустааҕы киин балыыһа хонтуоратын үлэһиттэрэ ыраахтан үлэҕэ көстүлэр. Тэрилтэлэргэ докумуону оҥоруу уонна тиксэрии интернетинэн барар. Редакция ыраахтан үлэҕэ көстө эрээри, улуус хаһыата график быһыытынан тахсар, оттон «Теплоэнергосервис» АУо салаата уонна ИДьО штаттаах эрэсииминэн үлэлииллэр.
Петропавловскай бөһүөлэгэр кыраныысса таһыттан кэлбит дьиэ кэргэн уонна кинилэри кытары алтыспыт дьон бэйэни изоляцияланыы эрэсиимигэр олороллор. Киин балыыһа сүрүн бырааһа Татьяна Рогожина этэринэн, омук сиригэр дьаарбайа барбыт дьон уонна көмүһү хостуур бириискэлэргэ 142 старатель кэлэллэрэ күүтүллэр. Онон, кулун тутар 23 күнүттэн улуус баһылыгын дьаһалынан «Амма» айан суолугар Уус Маайа бөһүөлэгэр киириигэ пост олохтонно. Онно медиктэр уонна полициялар дьуһуурустубалыыллар. Хас биирдии нэһилиэнньэлээх пууҥҥа коронавируска уорбаланар дьоҥҥо анаан обсерватортар тэрилиннилэр.
Улуус киинигэр дьиэлэриттэн тахсыбакка олорор сааһырбыт дьоҥҥо көмөлөһөр волонтердар этэрээттэрэ тэриллэн үлэлиир. Биирдэм урбаанньыт Влада Роговая медицинскэй мааска тигиитин саҕалаата, улуус дьаһалтата спонсордар көмөлөрүнэн нэһилиэнньэ көмүскэлэ суох араҥатын маасканан хааччыйарга былаанныыр. Бу туһунан Уус Маайаттан Елена Александрова иһитиннэрэр.
Раиса Сибирякова, «Саха сирэ» edersaas.ru