Долгутуулаах күммүт тирээн кэллэ. Дойдубут театральнай ускуустубатын саамай улахан уораҕайыгар, Улахан тыйаатырга лауреаттары биллэрии сиэрэ-туома үөрүүлээх быһыыга-майгыга ыытылынна.
edersaas.ru
Долгутуулаах фанфаралар тыаһаатылар уонна итальянскай көмүс быыс аһылынна. Бүгүн саамай улахан сценаттан “Кыһыл көмүс мааска” лауреаттарын биллэриэхтэрэ. Саха сирин бөлөҕүн СӨ үтүөлээх артыыһа Иннокентий Луковцев уонна Былатыан Ойуунускай аатынан Саха академическай тыйаатырын дириэктэрин солбуйааччы Михаил Егоров билиһиннэрдилэр.
Ол курдук, ХХV үбүлүөйдээх “Көмүс мааска” бириэмийэҕэ Саха сириттэн Былатыан Ойуунускай аатынан Саха академическай тыйаатырын “Мин доҕорум Гамлет” испэктээгэ “Улахан кээмэйдээх испэктээк”, “Режиссер үлэтэ” (Сергей Потапов), “Худуоһунньук үлэтэ” (Михаил Егоров) уонна “Көстүүмҥэ бастыҥ худуоһунньук” (Сардаана Федотова) кыайыы иһин кииристилэр.
Манна даҕатан эттэххэ¸быйыл Арассыыйа үгүс тыйаатыра У.Шекспир “Гамлет” испэктээгинэн кытынна. Араас номинацияларга Санкт Петербурдааҕы Ленсовет аатынан тыйаатыр, А.Пушкин аатынан Красноярскайдааҕы дыраама тыйаатыра уо.д.а. турдулар. Онон киирсии кытаанаҕа буолла. Номинацияҕа киирбит тыйаатырдар бары да дьоһуннаахтар уонна ытыктабылы, билиниини эрэйэллэр.
Биһиги номинацияларбытыгар лауреаттарынан буоллулар:
“Дыраамаҕа режиссер бастыҥ үлэтэ” – Кирилл Серебрянников (Гоголь-киин), “Дыраамаҕа бастыҥ испэктээк” – “Оптимистические трагедии. Прощальный бал” (Александринскай тыйаатыр), “Худуоһунньук бастыҥ үлэтэ” – Ксения Перетрухина “Утопия” испэктээккэ үлэтин иһин (Нациялар тыйаатырдара), “Көстүүмҥэ бастыҥ үлэ” – Александр Шишкин “Три толстяка” испэктээккэ үлэтин иһин (Товстоногов аатынан Улахан драматическай тыйаатыр).
Лена ТИМОФЕЕВА, “Саха сирэ”, edersaas.ru саайтка анаан