Мэҥэ-Хаҥалас улууһун Мэлдьэхси нэһилиэгэр “Көмүс күһүнү айхаллаан, бары бииргэ түмсүөҕүҥ!” — диэн бачыымынан, өрөспүүбүлүкэҕэ Сомоҕолоһуу сылын чэрчитинэн, күһүҥҥү дьаарбаҥка тэрээһиннээхтик ыытылынна.
Бу, нэһилиэккэ, Култуура-сынньалаҥ киинигэр буолбут күһүҥҥү дьаарбаҥкаҕа Мэлдьэхси олохтоохторо уонна академик Афанасий Чугунов аатынан агрооскуола үөрэнээччилэрэ, төрөппүттэрэ олус көхтөөхтүк кытыннылар.
Эрдэттэн нэһилиэк ыалларыгар биллэриллибит “Мин тиэргэним, мин нэһилиэгим” күрэхтэһиигэ, инстаграм нөҥүө куоластааһыҥҥа Анна, Семен Герасимовтар дьиэ кэргэн тэлгэһэлэрин иһигэр үүнээйи, сибэкки, мас арааһын, оҕуруот аһын эгэлгэтин, киһи хайгыы көрөр тэлгэһэлэрин олус тупсаҕай оҥоһуктарынан киэргэтэн, бастакы миэстэни ыллылар.
Оттон 2-с, 3-с миэстэлэри дьиэ хаһаайкалара Октябрина Шарина уонна Мария Охлопкова ыланнар, анал бирииһинэн наҕараадаланнылар.
Кылаастар икки ардыларыгар “Көмүс күһүн бэлэҕэ” куонкуруска оҕолор кылааһынан форма кэтэн, атрибут оҥостон, салаат эгэлгин астаан, алын сүһүөххэ 3-с кылаас (кылаас салайааччыта Алевтина Кривогорницына), орто сүһүөххэ 8-с кылаас (кылаас салайааччыта Айтал Плотников), үрдүкү сүһүөххэ 9-с кылаас (кылаас салайааччыта Иннокентий Сыромятников) бастаатылар.
Ону тэҥэ оҕуруот аһыттан “саамайдартан саамайдара” — улахан оҕурсу, хортуоппуй, помидор, сүбүөкүлэ, моркуоп аҕалан күрэcтэстилэр, анал ааттары ыллылар.
Бу күн үөрэнээччилэр төрөппүттэринээн ас астаан, нэһилиэнньэҕэ хамаҕатык атыылаан, 11-с кылаас 8700 солкуобайы киллэрэн, бастыҥ биисинэстээх кылаас буолла, кыайыылааҕынан таҕыста. Кинилэргэ оскуола дириэктэрэ Лариса Сыромятникова анал бирииһи туттарда.
Кылаастар “Көмүс күһүн” фотозона киэргэтэн, олохтоох сынньалаҥ киинэ туруорбут анал бириистэрин туттулар. Кыайыылаахтарынан 4-с кылаас (салайааччы Селина Алексеева), 7-с кылаас (салайааччы Саргылаана Плотникова) уонна 11-с кылаас (салайааччы Изабелла Степанова) буоллулар.
Үтүө үгэс быһыытынан ыытыллыбыт күһүҥҥү дьаарбаҥкаҕа үөрэнээччилэр, төрөппүттэр, нэһилиэк олохтоохторо көхтөөхтүк кыттыбыттарынан, оскуола администрацията дириҥ махталын тиэрдэр.
Надежда АНДРОСОВА,
Мэлдьэхси.