Москваҕа алтынньы 10 — 13 күннэригэр Бүтүн Арассыыйатааҕы «Көмүс күһүн» быыстапка-дьаарбаҥка сүүрбэһис төгүлүн ыытыллар.
Агропромышленнай комплекс эйгэтин бу бөдөҥ форумугар Саха Өрөспүүбүлэкэтэ сыллата көхтөөхтүк кыттар. Ол курдук былырыыҥҥы «Көмүс күһүн — 2017» быыстапка-дьаарбаҥкаҕа өрөспүүбүлүкэ хамаандата 14 (уон кыһыл көмүс, икки үрүҥ көмүс, икки боруонса) мэтээлинэн бэлиэтэнэн кэлбитэ.
Быйылгы тэрээһиҥҥэ уон биэс тэрилтэ, ол иһигэр «Дьокуускайдааҕы килиэп кэмбинээтэ», «Туймаада-Агроснаб» ААУо-лар, «Тымныы полюһа», «Саха сирин отонноро», «Хаҥалас Ас», «Амма» кэпэрэтииптэр, «Скиф», «Дьокуускайдааҕы балык хампаанньата», «Өлүөхүмэ кыладабыайа» ХЭТ-тэр о.д.а. кыттар буоллулар. Барыта холбоон аҕыс туонна кэриҥэ бородууксуйаны илдьээри бэлэмнии сылдьаллар.
Раиса Сибирякова, «Саха сирэ» edersaas.ru.