Көмүс хостооһунугар Саха сирэ Арассыыйаҕа үс бастакыга киирдэ

Өрөспүүбүлүкэ аныгы историятыгар Саха сирэ аан бастаан 28 туонна көмүһү хостоон, Арассыыйа үрдүнэн үс бастакы эрэгийиэн ахсааныгар киирдэ. Бырабыыталыстыба бэрэссэдээтэлэ Владимир Солодов этэринэн, ньиэп хостооһуна 12 мөлүйүөн туоннаҕа, таас чоҕу туһаҕа таһаарыы 17,7 мөлүйүөн туоннаҕа тиийдэ.

edersaas.ru

Бүтэһик биэс сыл иһигэр Сахабыт сирин  бырамыысыланнай оҥорон таһаарыыта хаһааҥҥытааҕар даҕаны таһаарыылаах буолла. Ол курдук таас чоҕу хостуурга «Денисовскай» хайаны байытар фабрика тутуллан үлэҕэ киирбитэ. Былырыын «Якутцемент» үһүс технологическай хайысхата тутуллан, 500 тыһыынча туонна сиэмэн оҥоһуллар кыахтаммыта. 2018 сылга өрөспүүбүлүкэҕэ «Гросс» көмүһү хостуур рудник аһыллыбыта, «Вертикальнай» сир баайдаах сиргэ үрүҥ көмүһү хостооһун, Үөһээ Муунаҕа алмааһы туһаҕа таһаарыы үлэтэ саҕаламмыта.

Оттон Дьокуускайга ууну ыраастыыр саҥа водозабор үлэҕэ киирбитэ даҕаны, уубут тоҕо эрэ ырааһырбата. Итии ууну арааран баран холбоотохторуна, уруккутун курдук дьэбиннээх, кирдээх уу сүүрэр. Ону идэлээх дьон ууну арааран баран холбоотохторуна, магистральнай турба иһинээҕи дьэбини, кири-хоҕу итии уу күүһэ эмискэ тоҕо сууйан ааһарынан быһаараллар. Онон дьиэҕэ диэри кэлэр турба ситимин барытын уларыттахха биирдэ уу ырааһырыан сөп курдук.

Марианна ТЫРТЫКОВА, «Саха сирэ» хаһыат, edersaas.ru