Булчуттарга уонна балыксыттарга аналлаах «Байанай» сурунаал, «Якутохотрыболовсоюз» уопсастыбаннай тэрилтэ уонна Арчы дьиэтэ Байанай ыйын түмүктүүр дьоро киэһэни саханы саха оҥорбут көмүс хатырыктаахха сүгүрүйэн, «Оо, собо барахсан!» диэн дьоро киэһэни тэрийэн ыытыахтара. Бу үтүө үгэскэ кубулуйбут тэрээһин Арчы дьиэтигэр сарсын, сэтинньи 25 күнүгэр, киэһэ 4 чаастан саҕаланарын иһитиннэрэбит.
Дьоро киэһэ бырагыраамата киэҥ: көрдөөх-нардаах, билиини-көрүүнү эрэйэр күрэхтэһиилэри сэргэ үүнэр сыл бастакы аҥаарыгар “Байанай” сурунаалга сурутуу, алгыс сиэрэ-туома, саамай улахан собоҕо, соботтон астаныллар бүлүүдэлэргэ, ким төһө элбэх собону сииригэр куоталаһыы итиэннэ саха быһаҕын, ыт оҕотун, о.д.а. булка сыһыаннаах табаардары, норуот уран уустарын оҥоһуктарын атыыта тэриллиэҕэ.
«Байанай» сурунаалы тэрийэн таһаарааччы Юрий Борисов этэринэн, ким улахан соболоох дьиэтиттэн анаан илдьэ кэлэн күрэхтэһиигэ кыттара уонна атыылыыра көҥүллэнэр. Холобур, былырыын муҥутуур улахан балыктаах киһиттэн соботун аукциоҥҥа 3 тыһ. тахса солкуобайга атыыласпыттар. «Булт маҕаһыыннара, норуот маастардара, эстрада ырыаһыттара кыттыыны ылыахтара, сүүйтэриитэ суох лотерея оонньонуоҕа, булт туһунан киинэ көрдөрүллүөҕэ. Быһата, ким кэлбит – чуҥкуйуо суоҕа. Саха сиэринэн буспут, ыһаарыламмыт минньигэс собо эгэлгэтин босхо амсайан-сиэн барыахтара», – диэн тэрийээччилэр эрэннэрэллэр. Ол гынан баран, Арчы дьиэтигэр мэнээх көтөн түспэккит: 2,5 мөһөөҕү төлөөтөххүтүнэ киирэҕит.
Сурунаал алтынньытааҕы 10-с нүөмэрэ балык булдугар анаммыт. Онон таһаарыы сүрүн ыалдьыттара – Дьокуускай куорат Лидия Шамаева дириэктэрдээх Айыы кыһатын үөрэнээччилэрэ уонна холобур буолар үлэлээх Аҕа сүбэтэ, кинилэр быйыл күһүн онус сылларын муҥхалаатылар. Сурунаал айар үлэһиттэрэ Айыы кыһатын иитиллээччилэрин кытта быйыл Нам улууһугар бииргэ муҥхалаабыттар. «Биһиги өбүгэбит үгэһин эдэр ыччакка киэҥник тарҕатар туһуттан күн-дьыл халандаарыгар Собо күнэ олохтонорун туруорсабыт, маннык дьоро киэһэлэри онно бэлэмнэнэн, сыалланан тэрийэбит», – диир Юрий Петрович.
Василий НИКИФОРОВ, «Саха сирэ» хаһыат, edersaas.ru