Бу күннэргэ Бүлүүтээҕи педагогическай училище үйэлээх үбүлүөйүн көрсө араас дириҥ ис хоһоонноох тэрээһин үлэ ыытыллар.
Араас сылларга бүтэрбит выпускниктары түмэр тэрээһининэн «Көмүс чуораан» улуустарынан айана буолар. Ахсынньы 9 күнүгэр «Көмүс чуораан» Ньурба улууһун Үөдэй уонна Хаҥалас нэһилиэктэригэр тиийдэ.
Бүлүүтээҕи профессиональнай-педагогическай кэллиэс дириэктэри үөрэх чааһыгар солбуйааччыта Александра Тутукарова тэрээһин туһунан бу курдук кэпсиир:
— Үөдэйгэ эспэдииссийэ кыттыылаахтарын Бүлүү педучилищетын 1978 сыллааҕы выпускницата, баһылык Мария Николаева көрсөн, өрөспүүбүлүкэ биллиилээх уопсастыбаннай-бэлитиичэскэй диэйэтэлэ Варвара Петрова искибиэр-уһаайбатыгар сылдьан, сибэкки дьөрбөтүн уурдубут.
Нэһилиэк оскуола-саадын дириэктэрэ, училище выпускницата Любовь Ли оскуола айымньылаах олоҕун билиһиннэрдэ.Бу оскуолаҕа Бүлүүтээҕи педучилищены араас сылларга бүтэрбит 5 выпускник үлэлиир эбит.
Ньурбаҕа ыытыллыбыт «Көмүс чуораан» педчеллендж училище бастакы выпускниктарыттан биирдэстэрэ, РСФСР уонна Саха АССР үтүөлээх учуутала, «Кыһыл сулус», «Ленин», «Үлэ Кыһыл Знамята» уордьаннар кавалердара, Аҕа дойду Улуу сэриитин кыттыылаҕа Николай Васильевич Егоровка уонна уопсастыбаннай-бэлитиичэскэй диэйэтэл, СӨ норуот хаһаайыстыбатын үтүөлээх үлэһитэ, «Бочуот Знага» уонна «Норуоттар доҕордоһуулара» уордьаннар кавалердара, Бүлүүтээҕи педучилище 1957 сыллааҕы выпускницатыгар Варвара Андреевна Петроваҕа ананна.
«Көмүс чуораан» тэрээһиҥҥэ Ил Түмэн бэрэссэдээтэлин солбуйааччы Антонина Григорьева Үөдэй нэһилиэгэр кэлэн, Варвара Петрова аатынан оскуола-саад бибилэтиэкэтигэр анаан дохсун ытыс тыаһынан доҕуһуоллатан 85 кинигэни Үөрэх миниистирин бастакы солбуйааччы Михаил Присяжнайтан анал сэртипикээт туттарда. Норуот дьокутаата оскуола оҕолорун айар дьоҕурдарын кытта билсэн баран, духуобунай уонна чөл куттаах ыччаты иитэллэригэр махталын биллэрдэ.
Ити курдук, «Көмүс чуораан» Бүлүү бөлөх улуустарынан сылдьан баран, сылы быһа өрөспүүбүлүкэ улуустарынан эрэллээх илииттэн илиигэ тиксэн, оскуола, оҕо уһуйаанын аайы Бүлүү педучилищетын араас сылларга бүтэрбит үтүөлээх дьону чиэстиэҕэ, оҕо иитиитигэр олохторун анаабыт уонна билигин ситиһиилээхтик үлэлии сылдьар учууталларга өйдөрүттэн-санааларыттан сүппэт, дууһаларыгар күндү дорҕоонноох чуораан тыаһын аныаҕа.
Елена ПОТОЦКАЯ, «Саха сирэ» хаһыат.
Хаартыска — Светлана Мытник тиксэриитэ.