«Бар дьон ордук ыарахан кэмҥэ түмсэр, доҕор көмөтө кыһалҕалаах күҥҥэ биллэр», – диэн мээнэҕэ этиллибэт.
edersaas.ru
Кырдьаҕас Бүлүү куорат бөдөҥ тэрилтэлэрэ уонна биирдэм урбаанньыттара балыыһаларга уонна кыаммат-кырдьаҕас дьоҥҥо көмөлөһөргө бастакынан туруннулар. Ол курдук, “Табун” хампаанньа баһылыктара, кэргэннии Оксана, Иван Ивановтар Бүлүүтээҕи киин балыыһа инфекционнай отделениетыгар таҥас сууйар массыынаны бэлэхтээтилэр, «Илгэ» потребуопсастыба (сал. О.Алексеева) бу отделениеҕа сытар ыарыһахтары аһынан-үөлүнэн күннэтэ хааччыйар. «Экоком» ХЭТ (сал. К.Г.Григорьева) аҕыс тыыл бэтэрээнигэр ас-үөл нобуорун, Р.Н.Егорова улуус дьаһалтатыгар мааска тигэргэ анаан рулоннаах таҥаһы буор босхо биэрдилэр.
Быйыл кыһын олунньуга «Ыраас уу» диэн иһэр ууну кутан таһар сулууспаны тэрийбит түөрт оҕолоох Анастасия, Николай Васильевтар уу ылар килийиэннэригэр бэйэлэрэ тикпит мааскаларын бэлэхтииллэр. Оттон Пенсионнай сулууспа, “Сбербанк” салааларын, “Сыа Бүлүү» кэпэрэтиип, оҕо саадтарын уо.д.а. үлэһиттэрэ балыыһа, обсерватор үлэһиттэригэр уонна кырдьаҕастарга харыстанар мааска, көстүүм тигэллэр. Нэһилиэктэр олохтоохторо бу үлэттэн туора турбаттар.
– Биһиги дьаһалтабыт матырыйаал атыылаһан аҕалбыта, онон ийэлэр түмсүүлэрэ холбоон 300 маасканы тиктибит, мин тоҕус маасканы тигэн туттардым, – диир Лөкөчөөн нэһилиэгин олохтооҕо Розалия Васильева. – Аны эмчиттэргэ анаан бүтэй көстүүм тигиэхтээхпит.
Раиса Сибирякова, «Саха сирэ» хаһыат, edersaas.ru