Уус-уран литература кириитикэтин уустук күрэҕэр инники күөҥҥэ баайаҕалар таҕыстылар.
edersaas.ru
Бу түгэн нэһилиэккэ кинигэни ааҕыы таһымын эрэ буолбакка, аахпыты ырытыы, анаарыы үрдүк таһымын көрдөрөр.
Улуу убайбыт Былатыан Ойуунускай талааннаах суруйааччыларынан билинэр Отооробо, Куутуйаараба саха бастакы үөрэхтээхтэрэ — баайаҕалар. Дэлэҕэ даҕаны, Михаил Слепцов-Отоороп нуучча биллиилээх суруйааччыта Лев Толстой «Война и мир» диэн романын сахалыы тылбаастыа дуо? Билиҥҥи кэм суруйааччыларыттан Николай Егоров-Баайаҕыын, Гаврил Андросов-Дойдулаах Суор — эмиэ баайаҕалар. Баайаҕаҕа саха тылын Поликарп Андросов, Маргарита Егорова курдук саха тылын дэгиттэр баһылаабыт, «Бырдьахаанныы» эттэххэ, тыл амтанын билбит сүдү учууталлар үлэлээбит үлэлэрин түмүгэ көстөр. Ол иһин баайаҕалар бары сахалыы куһаҕана суохтук суруйабыт, ааҕабыт. Баайаҕа нэһилиэгин «Көмүлүөк күлүмэ» айар түмсүүтэ кэккэ сылларга үлэлээн кэлбит айымньылаах үлэтэ үтүө түмүктэннэ.
Бары миэстэлэспит биир дойдулаахтарбынан киэн туттабын, ис сүрэхтэн эҕэрдэлиибин!
Иван НЕУСТРОЕВ,
учууталлар учууталлара,
Таатта улууһа, Баайаҕа
«Саха сирэ» хаһыат, edersaas.ru