Маны аах Тыа хаһаайыстыбата

“Күүлэт” кэпэрэтиип уһун кэмҥэ харайыллар үрүҥ аһы астыыр

Бүлүү улууһугар “Күүлэт” ПК үрүҥ аһы астыыр сыаҕар саҥа стрелизатор туруоруллан үлэтин саҕалаата.

Сыах аһыллар сиэригэр-туомугар улуус баһылыгын бастакы солбуйааччы Иван Евсеев, улуустааҕы тыа хаһаайыстыбатын департаменын салайааччыта Павел Иннокентьев уонна Күүлэт баһылыга Айаал Новиков кыттыыны ыллылар. Үрүҥ ас элбэх көрүҥүн астыырга туһаныллар стрелизатор хайдах ылыллыбытын туһунан Павел Иннокентьев маннык кэпсиир:


— Былырыын Тыа хаһаайыстыбатын министиэристибэтин граныгар кыттан, улууска икки стрелизациялыыр тэрили ылары ситиспиппит. Онон биэс маннык установка баарыттан иккитэ Бүлүүгэ бэриллибитэ. Мантан биирин Елена Тутукарова салайар “Күүлэт” кэпэрэтиип үүтү астыыр сыаҕар туруордубут. Былырыын исписэлиистэр кэлэннэр, стрелизаторы таҥан туруорбуттара уонна үлэлэппиттэрэ. Сыах оҥорон таһаарар икки ыйга тиийэ харайыллар пакеттаах үүтүн нэһилиэнньэ сөбүлээн ылар буолла. Бу тэриллэри ыларбытыгар улууспут салалтата, баһылыкпыт Сергей Винокуров көмөтө улахан. Кыттыгас үбүлээһининэн икки установкаҕа олохтоох бүддьүөттэн 8 мөл. солк. көрүллүбүтэ. Иккис стрелизатор Дьөккөҥҥө, “Уйгу” бааһынай хаһаайыстыбатыгар, туруорулунна. Бу тэриллэр “Сыа Бүлүү” ТХППК иһинэн ылылыннылар.

Эбэн эттэххэ стрелизациялыыр тэриллэргэ эттэн тушенканы уонна саахар диабеттаах дьоҥҥо саахары солбуйардаах барыанньалары оҥоруохха сөп. “Сыа Бүлүү” кэпэрэтиип этинэн тушенка оҥорбута, атыыга тута барбыта. Онон бу стрелизатордарынан уһун болдьоххо харайыллар дьон доруобуйатыгар куттала суох үүтү-эти астыырга олус табыгастаахтар.

edersaas.ru саайтка Бүлүүттэн

Андрей Яковлев -Чуос.

0
0