СӨ Ил Дархана Айсен Николаев Саха АССР 100 сылынан сибээстээн, быйыл биир кэлим эксээмэннэрин 100 баалга туттарбыт оҕолорго 100-түү тыһ. солк. бэриллэрин туһунан быһаарбыта.
В.П. Ларионов аатынан физика-тиэхиньиическэй лиссиэй учуутала, кылаас салайааччыта Агафья Протопопова:
— Быйыл кылааһым оҕолоро оскуоланы бүтэрэллэр. Кылааспар 28 оҕолоохпун, биир кэлим эксээмэҥҥэ бэлэмнэммиттэрэ ыраатта. Билигин эксээмэннэр саамай үгэннэрэ. Бүгүҥҥүттэн бастакы эксээмэннэр саҕаланнылар, оҕолорбун кытта тэҥҥэ долгуйабын.
Саамай сүрүнэ — эксээмэннэрин ситиһиилээхтик туттаран, баҕалаах үөрэхтэригэр киирдэллэр. Ил Дархан этиитигэр маннык санаалаахпын, биллэн турар, эксээмэннэрин 100 баалга туттарбыттарга 100 тыһ. солк. биэрии оҕоҕо көҕүлээһин буолар. Ханнык баҕарар оҕо хас да төгүл ыытыллар диагностыыр-хонтуруоллуур үлэттэн (ДКР) бэйэтин кыаҕын билэр. Оҕо таһыма араас, үрдүк баалга туттарарын эрдэттэн билэр оҕону чахчы көҕүлүүр. Оттон боруогу эрэ ааһар оҕо ити кэрчиккэ тиийэрэ уустуктардаах буолуон сөп. Онон, мин санаабар, икки өрүттээх: биир курдук, оҕо кыаҕын күөмчүлүүр, иккис курдук, оҕоҕо улахан көҕүлээһин, ыҥырыы буолар.
Кылааһым оҕолоругар эрэнэбин, алгыыбын. Бары оскуоланы бүтэрээччилэргэ ситиһиилээх эксээмэннэри, баҕарбыт үөрэхтэрин баһылаан чаҕылхай, эрэллээх үлэһит дьон буолан тахсалларыгар!”, — диэн санаатын үллэстэр.
Людмила ПОПОВА, “Саха сирэ” хаһыат, edersaas.ru