Көҥүл тустууга аан дойду Кубога: Арассыыйа Казахстаны, Кубаны, Азербайджаны кытта биир бөлөххө түбэстэ
Бэҕэһээ Швейцарияҕа баар Тустуу холбоһуктаах эйгэтин (UWW) квартира-штабыгар быйыл Америка Холбоһуктаах Штаттарыгар ыытыллар көҥүл тустууга аан дойду Кубогар кыттар хамаандалар сэрэбиэйдэһиилэрэ буолла.
Муус устар 7-8 күннэригэр Айова-Сити куоракка ыытыллар түһүлгэҕэ 2017 сыллаахха Парижка ыытыллыбыт аан дойду чөмпүйэнээтин түмүгүнэн аҕыс хамаанда сүүмэрдэммитэ.
Онон, Айова-Сити көбүөрүгэр кыттыахтара:
«А» бөлөххө: АХШ, Грузия, Япония, Иран.
«Б» бөлөххө: Арассыыйа, Казахстан, Куба, Азербайджан.
Аан дойду Кубогар быйыл АХШ-тан Джордан Барроуз (74 кг) уонна Кайл Снайдер (97 кг), Ирантан – олимпийскай чөмпүйүөн Хасан Язданичарати (92 кг), Грузияттан – олимпийскай чөмпүйүөн Ладо Хинчегашвили (65 кг) итиэннэ Рио-де-Жанейротааҕы Оонньуулар призердара Гено Петриашвили (125 кг), Азербайджантан – аан дойду үс төгүллээх чөмпүйүөнэ, Олимпиада призера Гаджи Алиев (65 кг), Япония сүүмэрдэммит хамаандатыттан – аан дойду чөмпүйүөнэ Юки Такахаши (57 кг) уонна аан дойду призера Сошуке Такатани (74 кг) кытталлара күүтүллэр.
Арассыыйа сүүмэрдэммит хамаандатын сүрүн тириэньэрэ Дзамболат Тедеев Америка Холбоһуктаах Штаттарыгар ыытыллар түһүлгэҕэ сүрүннээн бу тохсунньуга Красноярскайга буолбут Иван Ярыгин турнирыгар миэстэлэспит бөҕөстөр кыттыахтара диэн иһитиннэрэн турар. Билигин дойду сүүмэрдэммит хамаандата Сочи куоракка Улан-Удэҕэ (кулун тутар 9-12 күннэрэ) уонна Софияҕа (кулун тутар 22-25 күннэрэ) буолар норуоттар икки ардыларынааҕы турнирдарга кыттарга бэлэмнэнэр. Саха тумус туттар бөҕөстөрө, Арассыыйа былырыыҥҥы призердара Дмитрий Аксенов уонна Виктор Рассадин билигин эмиэ Сочига бааллар. Бу иннинэ Дзамболат Ильич бэйэлэрин үтүө өттүттэн көрдөрбүт тустууктар Америкаҕа туста барыахтарын сөбүн туһунан эппитэ. Онон уолаттарбыт дойду сүүмэрдэммит хамаандатыгар киллэриллиэхтэрэ диэн эрэниэҕиҥ.
Санатар буоллахха, 1973 сыллаахтан ыытыллар аан дойду Кубогар Арассыыйа хамаандата былырыын бэһис миэстэҕэ тахсыбыта.
Роман Попов, “Саха сирэ” хаһыат, edersaas.ru