Көҥүл тустууга Арассыыйа чөмпүйэнээтэ: 70 киилэҕэ лидердэр кимнээҕий? (ВИДЕО)
Ингушетияҕа ыытыллар көҥүл тустууга Арассыыйа чөмпүйэнээтэ саҕаланара күнтэн-күн чугаһаан иһэр, ону тэҥэ көҥүл тустууну сэҥээрээччилэр күүтүүлэрэ өссө күүһүрэр. Бүгүҥҥү күҥҥэ Саха Өрөспүүбүлүкэтин хамаандатыгар сүүрбэччэ бөҕөс баар. Оттон бүгүн 70 киилэ лидердэрин уонна Саха Өрөспүүбүлүкэтин араас таһымнаах күрэхтэһиилэргэ этэҥҥэ көмүскүү сылдьар Герман Устинов уонна Тимур Николаев ситиһиилэрин ырытан көрүөхпүт.
70 киилэҕэ Арассыыйа хамаандата аан дойду чөмпүйэнээтигэр бастакы миэстэни туппута хас да сыл буолла. Ол иһин, бу Арассыыйа чөмпүйэнээтигэр, 70 киилэ уоттаах-күөстээх буолуо диэтэхпинэ сыыстарбатым буолуо.
Лидердэр испииһэктэрин Дагестан бөҕөһө Магомед Курбаналиев саҕалыыр. Кини ааспыт аан дойду чөмпүйэнээтигэр 70 киилэҕэ тэҥнээҕин булбатаҕа. Маны таһынан, Европа чөмпүйүөнэ, икки тогүллээх Арассыыйа чөмпүйэнээтин кыайыылааҕа.
2015 сыллааҕы аан дойду чөмпүйүөнэ, Арассыыйа 2015 сыллааҕы кыайыылааҕа Дагестан бөҕөһө Магомедрасул Газимагомедов эчэйэн баран, чөлүгэр түһэн, лидердэр ахсааннарыгар киирэр.
Хайаан даҕаны лидердэр ахсааннарыгар 23 саастаах уолаттарга Европа призера, Арассыыйа чөмпүйэнээтин 2016 сыллаах кыайыылааҕа «Иван Ярыгин» Гран-При турнирын 2016 сыллааҕы чөмпүйүөнэ Осетия бөҕөһө — Заурбек Сидаков киирсэр.
70 киилэҕэ аан дойду 2014 сыллааҕы чөмпүйүөнэ Хотугу Осетияттан Хетаг Цаболов өссө биир «хаһаайынынан» буолар.
Чечня бөҕөһө Исраил Касумов быйыл «Иван Ярыгин» Гран-При турнирын кыайыылааҕа буолан, тустууну сэҥээрээччилэр үрдүк көрдөрүүнү күүтэллэр. Маны таһынан, Исраил Касумов 2016 сыллаах Европа чөмпүйэнээтин призера.
Бүрээт бөҕөһө Евгений Жербаев лидердэр ахсааннарыгар киирэрэ чахчы. Кини «Иван Ярыгин» Гран-При турнирын боруонса призера.
Саха өрөспүүбүлүкэтин хамаандатын Арассыыйа чөмпүйэнээтигэр 70 киилэҕэ Герман Устинов уонна Тимур Николаев көмүскүөхтэрэ. Эдэр бэйэлэригэр эрэллээх уолаттарбыт лидердэри «үөһэттэн аллараа» охторор кыахтаахтар. Герман икки нэдиэлэ анараа өттүгэр Саха Өрөспүүбүлүкэтин тустууга бэдэрээссийэтин бирииһигэр ыытыллыбыт аһаҕас турнирга аан дойду икки төгүллээх призерын, 2016 сыллаах Олимпийскай оонньуулар кыттыылааҕын Мандахнаран Ганзоригы финалга хотон, кыайыы өрөгөйүн билбитэ. Тимур Николаевы «темная лошадка» диэн мээнэҕэ эппэттэр. Кини саха норуотун түргэнник сайдан иһэр кэскиллээх бөҕөһө. Ааспыт күрэхтэһиигэ Герман Устинов уонна Мандахнаран Ганзориг кэнниттэн үһүс миэстэ буолбута. Уолаттарбытыгар Арассыыйа чөмпүйэнээтигэр үрдүк чыпчаалы дабайдыннар диэн ситиһиини баҕарабыт.
Николай Попов «Саха Сирэ» хаһыат, edersaas.ru
Хаартыска: интернеттэн
Видео: Николай Попов