Дьокуускайга ыытыллыбыт көҥүл тустууга аан дойду Кубогын туһунан Саха Өрөспүүбүлүкэтин бэрэсидьиэнэ Айсен Николаев уонна Арассыыйа тустууга федерациятын бэрэсидьиэнэ Михаил Мамиашвили санааларын үллэстэллэр.
Саха Өрөспүүбүлүкэтин Ил Дархана Айсен Николаев: “Аан дойду кубога ситиһиилээхтик ааста. Киин сиртэн ыраах куоракка даҕаны үрдүк таһымнаах турниры ыытыахха сөп эбит диэн күрэхтэһээччилэр уонна сүрүн тэрийээччилэр биллилэр. 46 сыл анараа өттүгэр икки саха — Павел Пинигин уонна Роман Дмитриев ССРС сүүмэрдэммит хамаандатыгар киирэн, аан дойду кубогын хаһаайыннарынан буолбуттара. Бу ситиһии хатыланан, быйылгы кубокка Арыйаан Тютрин уонна Виктор Рассадин Арассыыйа хамаандатыгар киирэн, кубок дойдубутугар хааларын ситистилэр. Виктор Лебедев улахан ситиһиилэрин кэнниттэн, саха тустуута өссө да инникилээҕин, кэскиллээҕин көрдөрөр, дакаастыыр хапсыһыылары уолаттарбыт көрдөрдүлэр дии саныыбын», — диэн санаатын үллэһиннэ.
Арассыыйа тустууга федерациятын бэрэсидьиэнэ Михаил Мамиашвили: “Бастатан туран, Саха сирин чулуу уолаттарын Павел Пинигины, Роман Дмитриевы, Александр Иванову, Виктор Лебедевы чиэстээн, Саха Өрөспүүбүлүкэтигэр бу күрэхтэһии ыытыллыбыта улахан суолталаах. Өрөспүүбүлүкэ баһылыга Айсен Николаев Кубок кэнниттэн тустуу суолтата, сайдыыта өссө күүһүрүөхтээҕин бэлиэтиир. Сүрүн сорук, кырдьык, ол буоллаҕа. Манна мустубут аан дойду бастыҥ тустууктарын хапсыһыыларын көрөн сүүһүнэн, тыһыынчанан оҕо тустууга уһуйуллуохтаах, саҥаттан-саҥа ситиһиигэ кынаттаныахтаах. Саха оҕолоро тустуунан өссө дьаныардаахтык дьарыктаныахтарын, Олимпиада чөмпүйүөнүгэр тиийэ ситиһиилэниэхтэрин баҕарабын”.
Айтана Аммосова, edersaas.ru