Бу күннэргэ Аммаҕа үгэннээн ыытылла турар Саха сирин норуоттарын VII спортивнай оонньууларын көҥүл тустууга биирдиилээн уонна хамаанданан бастыыр иһин күрэхтэһиитин бастакы күнүгэр уолаттарга уонна эр дьоҥҥо алталыы ыйааһыҥҥа хапсыһыылар “Амма-Олимп” стадиоҥҥа тэлгэтиллибит икки көбүөрүнэн ыытылыннылар.
Күрэхтэһии хамаанданан буолан, ыйааһын ахсын 16-лыы бастыҥ бөҕөс талыллан кэлэн кытынна. Чопчулаан эттэххэ, сүүмэрдээһин, былырыын Чурапчыга ыытыллыбыт Н.Н. Тарскай кэриэһигэр Саха Өрөспүүбүлүкэтин көҥүл тустууга биирдиилээн уонна хамаанданан бастыыр иһин чөмпүйэнээтин түмүгүнэн оҥоһуллубута. Төһө да билигин чулууларбыт Сочи куоракка Арассыыйа чөмпүйэнээтигэр кытта сылдьалларын үрдүнэн, хамаандалар Амматааҕы оонньууларга улахан суолта ууран, састааптарын толору оҥостон кэлбиттэрэ кэрэхсэбиллээх.
Хапсыһыылар даҕаны онно дьүөрэлии, бэрт хабырдык буоллулар. Ол гынан баран, барыта быраабыла быһыытынан. Көбүөргэ тустууну – норуоттар икки ардыларынааҕы категориялаах судьуйа Аркадий Тастыгин салайааччылаах судьуйалыыр кэллиэгийэ барытын сиэрдээхтик быһааран истэ.
Эрдэтээҥи суруйуубар ыйааһыннарынан күүстээхтэри билиһиннэрбитим. Ону, билигин финалистары кытта тэҥнээтэххэ, 57 киилэҕэ Роберт Окороков (Амма), 61 кг ыйааһыҥҥа Георгий Окороков (Амма), Ньургун Александров (Үөһээ Бүлүү), 70 киилэҕэ Василий Стручков (Дьааҥы) соһуччу хоттортоон кэбистилэр. Тус санаабар, ордук норуоттар икки ардыларынааҕы кылаастаах спорт маастара Ньургун Александров хотторуута соһуччу буолла. Кини 20 саастаах Быйаман Яковлевка (Устудьуоннар сойуустара) 4:6 ахсаанынан хотторон кэбистэ. Көрдөххө, наар бэйэтэ саҕалаабыт хамсааһыннарыгар утары албастарга кииртэлээн биэрдэ. Этэргэ дылы, саҕалаабытын тиһэҕэр тиэрдибэтэ.
Түһүлгэ биир бэлиэ түгэнинэн, аан дойду уонна Европа чөмпүйэнээттэрин призера, Арассыыйа уонна Белоруссия чөмпүйүөннэрэ, норуоттар икки ардыларынааҕы кылаастаах спорт маастара Александр Контоев сэргэх тустуута буолла. Кини төрөөбүт Горнайын аатыттан туһунна. Ол курдук, 37 cаастаах бөҕөс эдэрдэри тургутан көрдө. Бастаан Ньургустан Брощевы 5:2, онтон Иван Барашковы 4:0 ахсаанынан, финалга тахсар иһин киирсиигэ Никита Софроновы ыраастык кыайталаата. Онон эдэрдии эрчимин эргиппит Александр сарсын быһаарыылаах хапсыһыыга Виктор Степановы кытта киирсиэҕэ.
Финалга көрсүөхтэрэ:
Уолаттарга
45 кг: Лев Павлов (Сунтаар) – Алексей Сухарев (Горнай)
48 кг: Валентин Бурнашев (Амма) – Петр Гуляев (Мэҥэ Хаҥалас)
55 кг: Айсен Алексеев (Дьокуускай) – Александр Болуров (Сунтаар)
60 кг: Георгий Неустроев (Таатта) – Эльшад Агаев (Дьокуускай)
71 кг: Эдгар Кудаисов (Горнай) – Владимир Рачиков (ДьТХГА)
92 кг: Айаал Кузьмин (ДьТХГА) – Виталий Николаев (Чурапчы)
Эр дьоҥҥо
57 кг: Игорь Петров (Сунтаар) – Михаил Васильев (Горнай)
61 кг: Айтал Захаров (Чурапчы) – Владимир Егоров (Амма)
70 кг: Егор Пономарев (Чурапчы) – Игнат Андросов (Таатта)
74 кг: Виктор Степанов (Томпо) – Александр Контоев (Горнай)
86 кг: Дмитрий Шадрин (Орто Халыма) – Игорь Софронеев (Нам)
97 кг: Павел Верховцев (Мэҥэ Хаҥалас) – Кузьма Сивцев (Нам).
Аны сарсын тустуу күрэхтэһиитэ сарсыарда 09:00 чаастан саҕаланар. Итиэннэ – 65, 79, 92, 125 кг ыйааһын кыттыылаахтара күрэхтэһиини саҕалыыллар. Бастакы күннээҕи ыйааһыннар финаллара бүгүн киэһэ 18:00 чаастан ыытыллаллар. Оттон хаалбыт түөрт ыйааһыҥҥа чөмпүйүөн аатын быһаарар хапсыһыылар сарсын буолуохтара.
Петр ПАВЛОВ.