Сайын бүтэһик күнүгэр, атырдьах ыйын 31 күнүгэр «Зарница Challenge 2022» диэн туристическай слет буолан ааста. Уратыта диэн, аҕам саастаах уонна ыччат дьон биир хамаандаҕа, бииргэ кытыннылар. Улуустартан уонна Дьокуускай куораттан барыта 80 киһилээх 8 хамаанда кытынна.
Кадетскай оскуола-интэринээт полигонугар буолбут слету «Ветеран» ассоциация, «Победа» социальнай көмүскэл ресурснай киинэ тэрийэн ыыттылар. Бойобуой дьайыылар бэтэрээннэрин ассоциацията уонна Дьокуускайдааҕы кадетскай оскуола-интэринээт кыттыстылар. Турслет Ил Дархан граныгар үһүс төгүлүн ыытылынна.
Бэтэрээннэр, биэнсийэлээхтэр уонна ыччаттар бииргэ алтыһан, көлүөнэлэр солбуһууларын, уһун үйэлэнии, патриотическай иитии өйдөбүллэрин олоххо киллэрэллэр. Аҕам саастаахтар «Зарница» оонньууну оонньоон-оонньоон кэллэхтэрэ. Ол уопуттарын үүнэр көлүөнэҕэ тиэртилэр.
Хамаандалар “визиткэлэрин” көрдөрдүлэр, «Зарница» байыаннай-спортивнай балаһаҕа бэргэнник ытан, бастакы көмөнү оҥорон, гранатаны быраҕан, о.д.а. күрэхтэстилэр.
Ону тэҥэ, “Бастыҥ турист бутерброда”, “Бастыҥ ырыа”, “Бастыҥ бивуак” диэн күрэстэр бэһиэлэйдик ыытылыннылар. Итии хааһы сиэн, кутаа чэйин иһэн, гитаранан ыллаан, үҥкүүлээн, слет бэркэ ааста.
Ол түмүгэр, 1-кы миэстэни “Итии сүрэхтэр” хамаанда (Мэҥэ Хаҥалас) ылан, кыайыы өрөгөйүн биллэ.
2-с миэстэни — «Дьулуур» хамаанда (Нам), 3-с миэстэни – “Төлөн” хамаанда (Дьокуускай к., Гагаринскай уокурук) ыллылар. “Саамай түмсүүлээх хамаанда” аатын Бүлүүттэн «Оленск» ылла.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru.