Бүгүн — норуоппут биир сомоҕо күүһүн кэрэһилиир бэлиэ күн. Бу күн чэрчитинэн Дьокуускайга А.Е.Кулаковскай аатынан норуоттар доҕордоһууларын дьиэтигэр “Русской души святая краса” диэн бэртээхэй тэрээһин буолла.
Үөрүүлээх тэрээһиҥҥэ Улуу Кыайыы 75 сылын көрсө “Бэтэрээннэргэ кыһамньы” аахсыйанан ытык кырдьаҕастар ыалдьыттаатылар.
СӨ киһи быраабыгар боломуочунай Сардана Гурьева өрөспүүбүлүкэ бары олохтоохторугар, тэрээһин түһүлгэтигэр мустубут ыалдьыттарга Норуот сомоҕолоһуутун күнүнэн истиҥ эҕэрдэтин тиэртэ:
—Билиҥҥи кэмҥэ норуоттар түмсүүлээх, сомоҕолоһуулаах буоларбыт олорор олохпутуттан көстөр. Бу курдук бары өрүү бииргэ, эйэ дэмнээх буоллахпытына, өрө көтөҕүллүүлээхтик үлэлээтэхпитинэ-хамсаатахпытына олохпутун сайыннаран, салгыы тупсаран иһиэхпит.
Биһиги ытык кырдьаҕастарга, бэтэрээннэргэ төһө кыалларынан көмөлөһөн, “Бэтэрээннэргэ кыһамньы” диэн аахсыйаны тэрийэн ыытабыт. Тэрээһин быйыл ыам ыйын 8 күнүттэн саҕаламмыта. Онно аан бастаан ытык кырдьаҕастарбытын “Мин үрдүбэр күн хаһан да киирбэт” диэн киинэҕэ сырытыннарбыппыт. Оттон бүгүҥҥү аахсыйаҕа РФ ИДьМ тырааныспарга Хотугулуу-Илиҥҥи линейнай управлениетын кытары кыттыһан Дьокуускай куоракка кырдьаҕастар интэринээт-дьиэлэригэр олорор бэтэрээннэри бу тэрээһиҥҥэ ыҥыран ыалдьыттаттыбыт.
Манна даҕатан эттэхпинэ, биһиги ытык кырдьаҕастарбытыгар аныыр үлэбит киэҥ хабаанаахтык ыытыллар. Кырдьаҕастар бырааптарын араҥаччылыырга СӨ Үлэ уонна социальнай сайдыы министиэристибэтин кытары ити хайысхаҕа тиһиктээх үлэни ыытабыт. Кэмиттэн-кэмигэр кырдьаҕастар дьиэлэригэр сылдьан олохторун-дьаһахтарын билсэбит, санааларын истэбит, ыйытыыларыгар хоруйдуубут. Кинилэр бырааптара кэһиллибит буоллаҕына бэрэбиэркэлэр оҥоһулланнар, сөптөөх миэрэлэр ылыллаллар.
Эһээлэрбит эбээлэрбит кэриэтэ дьоҥҥо ис сүрэхпититтэн истиҥник сыһыаннастахпытына, көлүөнэ ситимэ быстыбат диэн бигэ эрэллээхпит.
Бүгүҥҥү долгутуулаах тэрээһиҥҥэ кырдьаҕастары өйөөн “Синет” уонна “Стиль Маркет” хампаанньалар спонсордаабыттарыгар, А.Е.Кулаковскай аатынан норуоттар доҕордоһууларын дьиэтин кэлэктиибигэр илиилэрин утары уунан өйөбүл буолбуттарыгар, бэртээхэй, сэргэх кэнсиэргэ кыттыбыт бары ансаамбылларга махталбын тиэрдэбин.
Кырдьаҕаска кыра да наада
Өрөспүүбүлүкэтээҕи кырдьаҕастар дьиэлэригэр иитээччинэн үлэлиир Яна Петрова:
— Владимир Ильин салайар өрөспүүбүлүкэтээҕи кырдьаҕастар дьиэлэриттэн бүгүн социальнай үлэ исписэлииһэ Лена Сыромятникова, кырдьаҕастар дьиэлэрин дириэктэрин социальнай үлэҕэ солбуйар Роза Олесова буоламмыт икки куорпустан уопсайа 20 ытык кырдьаҕаһы арыаллаан аҕаллыбыт. Барахсаттар манна кэлэллэрин нэдиэлэ анараа өттүгэр эппиппит. Ол күнтэн долгуйан ох курдук оҥостон, бэлэмнэнэн бөҕө буоллулар. Быраас доруобуйаларын көрөн, бэрэбиэркэлээн баран көҥүл биэртэлээтэ. Онон дьоммут үөрүү бөҕөлөр. Кырдьаҕастарга кыра да наада.
Бу курдук Саха академическай драматическай, нуучча драматическай, Суорун Омоллоон аатынан Опера уонна балет тыйаатырдарын кытары эмиэ ыкса сибээһи тутабыт, дьоммутун сырытыннарабыт.
Бүгүн Норуот сомоҕолоһуутун күнүнэн бэртээхэй кэнсиэри көрөн улаханнык астыннылар.
Сардаана БАСНАЕВА.
Айталина АРГУНОВА хаартыскаҕа түһэриитэ