Уолаттарбыт Иван Ярыгин турнирыгар кыттарга бэлэмнэнэ сылдьалларын тиийэн көрдүм.
Петр Павлов, “Саха сирэ” хаһыат, https://edersaas.ru/
Красноярскайдааҕы норуоттар икки ардыларынааҕы турнир улам чугаһаатаҕын ахсын кэпсэтиилэр, ырытыһыылар, сабаҕалааһыннар үксүүллэр. Саха сирин хамаандатыгар бу турнир сылы саҕалыыр саамай эппиэттээх түһүлгэ.
Бээтинсэ күн бэлэмнэниини билсэ “Триумф” Спорка бэлэмнэнии киинигэр тиийэ сырыттыбыт. Хамаанда былаан быһыытынан үөрэтэр-эрчийэр түмсүү түмүктүүр түһүмэҕэр таҕыста. Бүтэһик нэдиэлэҕэ хонтуруоллуур хапсыһыылар уонна көбүөргэ үлэ ыытылынна. Киэһээҥҥи эрчиллии улахан саалаҕа баскетбол оонньуунан саҕаланна. Тустууктар икки хамаандаҕа арахсан бэрт көхтөөхтүк мээчиги сытыытык бэрсэн, хардары-таары кимээһиннээх быраҕыылары оҥорсоллор.
Ол аайы кытыыга турар хамаанда кылаабынай тренерэ Владимир Кириллин уонна кини көмөлөһөөччүлэрэ Иван Дмитриев, Артур Федоров оонньууну өссө сытыырхатан сүбэлээн, эбэтэр кими эрэ өссө көхтөөхтүк оонньуурга ыҥыран көх-нэм буолаллар. Сотору тиритэ-хорута сүүрбүт, футболкалара көлөһүннэриттэн инчэйбит, ол эрээри, үчүгэй оонньууттан санаалара көтөҕүллүбүт бөҕөстөр аны үөһээ саалаҕа тахсан, кылаабынай тренер сорудаҕынан паараларга арахсан, көбүөргэ үлэлэрин саҕалаатылар…
Тустуу салаатыгар киирээппин кытта тута көлөһүн сыта саба биэрдэ. Маат тыаһа сыыбырҕас, уолаттар көбүөргэ үөрэ-көтө үлэлээн, сороҕор албастарын чочуйан тыастаах соҕустук бырахсаллар, ардыгар намыһахтык атахтаан сытыытык киириилэригэр, санааҕар, көбүөртэн сиэрэ уота умайарга дылы буолар…
Владимир Кириллин эппитинэн, Красноярскайга уопуттаах бөҕөстөрү тэҥэ эдэрдэр эмиэ күүстэрин холонуохтара. Сүрүн састаапка Россия чөмпүйэнээтигэр ситиһиилээхтик кыттыбыт Егор Пономарев, Виктор Рассадин, Арыйаан Тютрин, Ньургун Скрябин, Вячеслав Ефремов, Виктор Степанов бааллар. Россия спортивнай тустууга федерациятын ирдэбилин быһыытынан Красноярскайдааҕы турнирга Саха сириттэн 12 бөҕөс киирбитэ. Ону тэҥэ, эбии испииһэк быһыытынан эдэр бөҕөстөрү киллэрэргэ сайаапка ыытыллыбыт. Онон чопчу хас бөҕөс кыттара билиҥҥитэ биллибэт. Барыта миэстэҕэ тиийэн баран быһаарыллыа – диир Владимир Николаевич.
Көбүөргэ Арыйаан Тютрин Герман Устиновтыын хардары-таары албастары чочуйан бырахсаллар. Ону РФ үтүөлээх тренерэ Будимир Яковлев кэтээн көрөн дөрүҥ-дөрүҥ киирсиини тохтотон сүбэлиир, сыыһаларын-халтыларын ыйар. Оттон бу Виктор Степанов дьүлэйдэргэ Россия чөмпүйэнээтигэр кыттаары сылдьар Василий Стрекаловскайдыын, Виктор Рассадин – Айхан Антоновтыын, Егор Пономарев – Константин Власовтыын… пааралаһан хапсыһа сылдьаллар. Ити курдук, кылаабынай тренер хамаандатынан кылгастык тыын ыла-ыла, бөҕөстөр көбүөргэ киирэн анал сорудах быһыытынан үлэлээтилэр.
Маны барытын быраас Лидия Аргунова кэтээн көрдө. Ханныгын да иһин, улахан күрэхтэһиигэ бэлэмнэнии таһыма уонна хамаанда уопсай ситиһиитэ – спортсменнар, тренердэр уонна медиктэр бары биир санаа курдук үлэлэриттэн тутулуктаах буоллаҕа.
Эрчиллиини СӨ Спорка миниистирин бастакы солбуйааччы, норуоттар икки ардыларынааҕы категориялаах судьуйа Семен Чердонов, Үрдүкү спортивнай маастарыстыба оскуолатын дириэктэрин бастакы солбуйааччы, норуоттар икки ардыларынааҕы кылаастаах спорт маастара Леонид Спиридонов кыраҕытык кэтээн көрдүлэр.
Дьэ ити курдук, Саха сирин тустууга хамаандата Иван Ярыгин турнирыгар бэлэмнэниитин бүтэһик эрчиллиитэ көхтөөхтүк ыытылынна. Оттон СӨ үтүөлээх тренерэ Иван Дмитриев иитиллээччитэ Виктор Рассадинныын салгыы хаалан, эбии дьарыктаннылар. Бу сырыыга кылгас сиргэ түргэнник сүүрүүгэ. Чугасыһан кэлэн ботур-ботур тугу эрэ кэпсэтэллэр, күлсэллэр. Тренер уонна спортсмен бэйэ-бэйэни өйдөһүүлэриттэн, ытыктабыллаах истиҥ сыһыаннарыттан ситиһии үөскүүр буоллаҕа.
Ааранан мин санаам көтөҕүллэн, тренердэр түбүктээх үлэлэрэ түмүктээх буоларыгар, оттон уолаттарбыт көмүс көлөһүннэрэ мэтээл буолан эргиллэригэр баҕардым. Били тэлэбиидэнньэ үлэһиттэрин ыйытыыларыгар үс бастакы ыйааһыҥҥа, ол аата 57, 61 уонна 65 киилэлэргэ бөҕөстөрбүт хайаан да мэтээлгэ тиксиэхтээхтэр диэн сабаҕалааһыным туоларыгар эрэл санаалаах саалаттан таҕыстым.
Петр Павлов, “Саха сирэ” хаһыат, https://edersaas.ru/
Ааптар хаартыскаҕа түһэриилэрэ.
ВИДЕО (финал, 61 киилэ, Скрябин, 2016 с.):