Өрөспүүбүлүкэтээҕи педагогическай дьаарбаҥкаҕа Ньурбаттан, Үөһээ Бүлүүттэн, Өлүөхүмэттэн, Орто Халыматтан, Өймөкөөнтөн, Уус Алдантан, Чурапчыттан кэлбит ыалдьыттар Таатта улууһугар Дьохсоҕоҥҥо күнү көрсөр түһүлгэҕэ сылдьыбыттар, алгыс түспүт түһүлгэтигэр арчыламмыттар. Ол кэнниттэн «Куорсун» айар түмсүүгэ ыалдьыттаабыттар. Бу туһунан нэһилиэк бибилэтиэкэрэ, айар түмсүү салайааччыта Галина Другина кэпсиир.
—Биһиги нэһилиэкпитигэр «Куорсун» айар түмсүүбүт бастакы ыалдьыттарынан дьаарбаҥка кыттыылаахтара буоллулар. Ыраахтан кэлбит ыалдьыттарга түмсүүбүт үлэтин-хамнаһын билиһиннэрдибит, өйдүү-саныы сылдьарга хаартыскаҕа түстүбүт, — диэн саҕалыыр кэпсээнин Галина Другина. — Бастатан туран, тумус туттар ытык киһибит, тыыл, үлэ, сцена бэтэрээнэ, уһун кэмҥэ нэһилиэккэ бэтэрээннэр түмсүүлэрин сатабыллаахтык салайбыт Иван Бочонин уран тыллаах хоһооннору суруйарын сэргэ, пьесаны эмиэ суруйар. Кини айымньылара өрөспүүбүлүкэ, улуус хаһыаттарыгар, сурунаалларыгар бэчээттэнэллэр. Иван Михайлович айар куонкурустарга үөрүүнэн кыттара атыттарга холобур буолар. Бу күн кини ыраахтан кэлбит ыалдьыттары кытары атах тэпсэн олорон ирэ-хоро сэһэргэстэ, айар үлэтин туһунан сырдатта.
Салгыы Акулина Егасова-Дьохсоҕон кыыһа ыалдьыттарга айбыт олоҥхолорун туһунан сырдатта. Оҕолорго анаан суруйбут икки олоҥхо-остуоруйатын, уратытык толкуйдаммыт аккырыыкканан остуоруйа-олоҥхотун көрдөрөн сэҥээриини ылла. Ыйытыыларга хоруйдаата.
Нэһилиэкпит Өрөгөй ырыатын ааптара Альбина Тарбахова-Таатта кыыһа Алексей Калининскай ырыанньыгар киирбит ырыа-хоһооннорун уонна бэйэтин хоһооннорун, хаартыскаларынан ситэриллибит биэс саҥа альбомун киэҥ эйгэҕэ таһаарда, дьоҥҥо-сэргэҕэ билиһиннэрдэ.
Валентина Пинигина-Арылы Алампаҕа анаабыт «Алампа туллуга» хоһоонун сахалыы, нууччалыы тылынан аахта уонна бэйэтэ айбыт нарын матыыбыгар толорон бэлэх ууммута ытыс тыаһынан арыалланна.
Реас Кулаковскай төрөөбүтэ 105 сылыгар аналлаах өрөспүүбүлүкэтээҕи күөн күрэс оҕолорго кыайыылааҕа Арсен Матвеев, Мария Сивцева Алампаҕа анаабыт бэйэлэрин хоһооннорун аахтылар.
М.А.Петров аатынан нэһилиэк бибилэтиэкэтин «Луч» сайынын үлэлиир ааҕыы лааҕырыгар дьарыктанар оҕолор киэн туттар биир дойдулаахпыт Өксөкүлээх Өлөксөй «Куоска» хоһоонун дорҕоонноохтук ааҕан хайҕаннылар. Маныаха бу хоһоону ааҕыыга, Дьокуускай куоракка нууччалыы тылынан үөрэнэр үс оҕо, сахалыы аахпыттара биһирэннэ. Кинилэр кэннилэриттэн Сулустаан Габышев «Оскуола» хоһоону доргуччу ааҕан иһитиннэрдэ.
Айылҕалыын алтыһар, айылҕа эмтиир, араҥаччылыыр туһатын дьоҥҥо-сэргэҕэ тарҕатааччы Любовь Власова педагогическай дьаарбаҥка кыттыылаахтарыгар кучу чэй уонна үөрэ от туһатын туһунан оскуолаҕа ыытыллыбыт тэрээһиҥҥэ кэпсээн, көрдөрөн болҕомтону тарта.
Саҥа анабыл хоһоонунан айар үлэтин саҕалааччы, норуот айымньытын дьиэтин дириэктэрэ Изабелла Жараева үҥкүү ансаамбылын кытта кырасыабай сахалыы үҥкүүнэн эҕэрдэлээтэ.
Биэс кинигэлээх ааптар Мария Ефимова оҕолорго чабырҕахтарын, таабырыннарын кинигэлэрин уонна хоһооннорун хомуурунньугун ыалдьыттар сэргээн көрдүлэр.
Ытык киһибит Валентина Харайданова-Эбээ Валя Хадаайыга олоҥхону толорууга сиэннэрин, хос сиэннэрин кытары кытта киирбитинэн, кини айар үлэтин биһиги билиһиннэрдибит, сырдаттыбыт.
Быйыл Р.Кулаковскай төрөөбүтэ 105, С.Кулачиков-Эллэй төрөөбүтэ 115 сылларыгар аналлаах улуустааҕы литературнай пикниккэ кыттан Кылаан бириис хаһаайката буолбут Мария Лопатырева-Сайылык кыыһа Реас Алексеевичка анабыл хоһоонун аахта. Ити курдук нэһилиэк айар түмсүүтүн ааптардара үлэлэрин сырдаттылар, ыраахтан кэлбит ыалдьыттары кытары ирэ-хоро кэпсэттилэр, үлэ-хамнас туһунан сэһэргэстилэр, — диэн кэпсээтэ.
Айар куттаах дьон сонун көрсүһүүттэн, истиҥ сэһэргэһииттэн сэргэхсийбиттэр, сүргэлэрэ көтөҕүллүбүт. Көҥүл иэйии салгыныгар уйдаран айар-тутар баҕалара күүһүрбүт.