«Доруобуйа» федеральнай бырагыраама чэрчитинэн, бастакы суһал көмөнү оҥорууга болҕомто өрүү ууруллар. Холобур, Саҥа дьыл буолуон аҕай иннинэ Алдан, Үөһээ Бүлүү, Кэбээйи, Мэҥэ Хаҥалас, Нам, Ньурба, Сунтаар, Томпо, Уус Алдан, Хаҥалас уонна Чурапчы улуустарын киин балыыһаларыгар КАМаз көлө баазатыгар оҥоһуллубут көһө сылдьар мэдиссиинискэй комплексы үөрүүлээх быһыыга-майгыга туттардылар.
Маны олоххо киллэрэргэ федеральнай уонна өрөспүүбүлүкэ бүддьүөттэриттэн 235 мөл. солк. тыырылынна.
«Доруобуйа» федеральнай бырагыраама чэрчитинэн, биһиги өрөспүүбүлүкэбит мобильнай мэдиссиинискэй комплексы ылла, балар ыраах сытар нэһилиэктэргэ тустаах көмөнү оҥоруохтара.
Доруобуйа уон сыллаах былаанынан тустаах үлэни салгыы ыытыахпыт. Төһө кыалларынан, мэдиссиинэ киһи ханна олороруттан тутулуга суох чугас буоларын толору хааччыйыахтаахпыт», — диэн Ил Дархан Айсен Николаев эҕэрдэ тылыгар эттэ.
Мэдиссиинискэй саҥа комплекстар дефибриллятордаахтар, электрокардиографамиялаахтар, гемоглобин, глюкоза уонна холестерин анаалыстарын быһаарар аппарааттардаах.
«Анал комплексы ылан олус үөрдүбүт. Этэргэ дылы, «көлүөһэлээх поликлиника» диэххэ наада. Улуус кииннэриттэн ыраах сытар нэһилиэктэр олохтоохторун доруобуйаларын көрөргө-истэргэ бары өттүнэн барсар», — диэн Ньурба улууһунааҕы киин балыыһа кылаабынай бырааһа Наталья Павлова санаатын эттэ. Кэлэр сыл тохсунньутугар маннык комплекстары Дьааҥы, Ленскэй уонна Уус Маайа улуустара ылыахтара.