Иллэрээ күн Сунтаар улууһун баһылыга Анатолий Григорьев, улуустааҕы тыа хаһаайыстыбатын управлениетын начаалынньыга Иван Тихонов Түбэй Дьаархан, Күүкэй уонна Элгээйи нэһилиэктэригэр оробуочай сырыыны оҥордулар.
edersaas.ru
Бастатан туран, Түбэй Дьаархаҥҥа эт араас бородууксуйатын
оҥорон таһаарар дьоҕус (модульнай) киини көрдүлэр. Манна аны күһүн эт бородууксуйатын оҥорон таһааран нэһилиэнньэҕэ батарыахтара. Күҥҥэ 250 киилэ бородууксуйаны оҥорор кыахтаах. Сүрүннээччилэринэн «Арыылаах» кэпэрэтиип буолар.
Ол кэннэ Михаил Комин хаһаайыстыбатын үлэтин кытары билистилэр. Быйыл кинилэр Арыылаах сыһыытыгар
50-ча гектар сиргэ туораахтаах култуураны ыспыттар.
Бааһынай хаһаайыстыбата Кубалаах сайылыгар баар 37 тарбыйахтарын Егоров Алькор кэргэнинээн көрөллөр.
Оробуочай бөлөх салгыы Күүкэйгэ үлэлээтэ. Авдей Федоров бааһынай хаһаайыстыбата уонна Даниловтар дьиэ кэргэттэрэ от кэбиһэ сылдьалларыгар түбэстилэр. Онон үлэ күөстүү оргуйар.
Күүкэй күөлүгэр 20 мөл. солк. суумалаах шлюз-регулятор тутулла турар. Күүкэйдэр бу тутууну туруорсубуттара быданнаата. Билигин бетону кутуу үлэтэ бара турар.
Куораттан уонча киһи кэлэн үлэлиир. Тутуу алтынньы саҕаланыыта үлэҕэ киириэхтээх.
Элгээйигэ Улгуттаҕа отчут Поповтарга сырыттылар. Ол кэннэ, «Элгээйи» кэпэрэтиип үлэтин билистилэр. Кинилэр билигин оҕуруот аһын, хортуоппуйу хаһаанар арочнай ыскылааты тута сылдьаллар. Кэпэрэтиип дириэктэрэ Семен Попов тутуу үлэҕэ эһиил киириэхтээҕин кэпсээтэ. Быйыл хортуоппуйу, хаппыыстаны олордубуттар.
Гаврил Андреев, Сунтаар, edersaas.ru саайтка анаан