Самсоновтар учууталлар династиялара саҕалаабыт оскуолалара номнуо 100 сылын туолан үөрүүлээх үбүлүөйүгэр бар дьонун ыҥырда!
edersaas.ru, Мария Кобельянова
Никита Самсонов өйдөбүнньүгэр сибэкки дьөрбөтүн ууран сүүс сылы бэлиэтиинр туом саҕаланна. Манна үөрэҕирии үлэһиттэрин пленарнай мунньаҕа, В.В.Илларионов «Олоҥхо — мин олохпор» кинигэтин быыстапката, эҕэрдэ кэнсиэр тэрилиннэ. Тэрээһин үөрүүлээх арыллыытыгар Арассыыйатааҕы, өрөспүүбүлүкэтээҕи наҕараадалар туттарылыннылар. Ол кэннэ Александр Акимов «Кэрэни кэрэхсээ» диэн ааттаан оскуолаҕа бэлэхтээбит хартыыналарын быыстапката арылынна.
Бу күн 90 саастаах ытык кырдьаҕас Прокопий Филиппов аатын алын сүһүөх кылааска иҥэрдилэр. Ол кэннэ «100 саастаах оскуола сэһэнэ» кинигэ сүрэхтэннэ. Үбүлүөй иккис күнүгэр бастакы оскуола турбут сиригэр — Мэлдьэкэҕэ тахсан учууталларга аналлаах өйдөбүнньүк бэлиэ арылынна. Ол кэннэ удьуор оһуокайдьыт Константин Акимов — Чооруос бирииһигэр оскуола выпускниктарыгар оһуокай күрэһэ тэрилиннэ. Онтон нэһилиэнньэ дьонугар Александр Акимов бирииһигэр «Көлүөнэлэр көҕүтүһэн көччүйүөххэ күөх дуолга» спортивнай уонна Күүкэй күөрэгэйэ — Мааппыс бирииһигэр ырыа, хоһоон айааччылар күрэстэрэ ыытылыннылар.
Егор Алексеев салайааччылаах сүүс сыллаах оскуола кэлэктиибин уонна нэһилиэнньэ бары дьонун, оҕолорун үөрүүлээх үтүө үбүлүөйгүтүнэн эҕэрдэ эгэлгэтин аныыбыт! Аны бу күннэргэ Күндэйэ орто оскуолата 100 сылын бэлиэтиэҕэ!
edersaas.ru, Мария Кобельянова-Тускулаана, Сунтаар