Сунтаар улууһун Күүкэй нэһилиэгин төрүт олохтооҕо Осип Андреевы биир дойдулаахтара аныгы көлүөнэ мындыр өйдөөх, уран тарбахтаах ууһун, рационализаторын быһыытынан билэллэр. Сорохтор сөбүлээн «Кулибин» диэн ааттыыллар.
Кини төһө даҕаны анал тиэхиньиическэй идэтэ суох эрээри, сахалыы булугас өйүнэн-санаатынан салайтаран араас тиэхиньикэни айан таһааран, күүкэйдэри эрэ буолбакка, бүтүн өрөспүүбүлүкэ олохтоохторун сөхтөрөр. Бу саас Осип бэйэтин бырайыагынан вездеход оҥорон соһуппута.
– Дьыала оҥоруутугар буолбатах дии саныыбын. Толкуйдааһыҥҥа, бырайыагын оҥорууга үгүс бириэмэ барар. Букатын, хас да сылы быһа төбөбөр илдьэ сылдьан толкуйдуохпун, уруһуйдаан көрүөхпүн сөп. Ону таһынан саппаас чааһын булууга-талыыга күн-дьыл баранар. Урукку быраҕыллыбыт тиэхиньикэ саппаас чааһын туһанабын. Дьиҥэр, билиҥҥи үйэҕэ айарга-тутарга туох барыта баар ээ. Интернеккэ киирэн рационализатордар, сонун идеялаах дьон оҥоһуктарын көрөн, киһи элбэххэ үөрэниэн сөп», – диэн Осип кэпсиир. Бассаабы биир гына аймаабыт вездеходун оҥороругар хас да массыына саппаас чаастарын туттубут. Тиэхиньикэ арааматын тимир илииһинэн сыбааркалаабыт. Онтута бырыыны-бадарааны ортотунан сылдьарын таһынан, ууга эмиэ устар.
Осип дэгиттэр талааннаах, барыга-бары дьоҕурдаах киһи. Кини массыына өрөмүөннүүр мастарыскыайы үлэлэппитэ хаһыс да сылыгар барда. Массыыналарын анаан-минээн киниэхэ оҥортороору, оннооҕор ыаллыы сытар улуустартан кэлэллэр. Аны Күүкэй нэһилиэгин үгүс ыалларын дьиэлэрин толору хааччыллыылаах гына, эмиэ кини оҥорбута. Бүгүҥҥү туругунан нэһилиэк 20%-на итии-тымныы уунан, канализациянан хааччыллан олороллор.
Билигин Осип ВПП (вездеход повышенной проходимости) оҥороору матырыйаал хомуйа сылдьар. Тас көрүҥүн, бырайыагын бэлэмниир.
Анивера АКИМОВА.