Саха сиригэр киэҥник биллэр «Сюрприз» үҥкүү ансаамбыла Соҕуруу Кэриэйэ Ванжу куоратыгар «Үҥкүү карнавала» диэн норуоттар икки ардыларынааҕы бэстибээлгэ кытынна.
Үҥкүү бырааһынньыгар мантан барыта 19 оҕо, икки төрөппүт, икки педагог (уус-уран салайааччы СӨ култууратын үтүөлээх үлэһитэ, СӨ үөрэҕириитин туйгуна Ирина Егорова. Гостуруол бөлөҕүн салайааччылар уонна күөн күрэс бырагырааматын туруорааччылар Виктория Дьяконова, Диана Посельская) баран кэлбиттэр. Оҕолор бу кыттыыларынан Сахаларын сирин сэргэ, бүтүн Арассыыйаны үрдүктүк ааттаппыттар. Алта бастыҥ кэлэктиип иһигэр киирэннэр, дипломунан наҕараадаламмыттар.
Тэрээһин ирдэбилинэн, биэс мүнүүтэ иһигэр оҕолор баараҕай былаһааккаҕа бырагыраамаларын билиһиннэрбиттэр. Бэлиэтээбиттэринэн, күрэстэһээччилэргэ саастарынан хааччах суоҕа, кыттааччы ахсаана учуоттаммата уустук буолбут. Онон 10-16 саастаах оҕолор — «сюрпризтар» улахан дьону, идэтийбит үҥкүүһүттэри кытары күөн көрсүбүттэр.
Ол эрээри, оҕолор чаҕылхай толорууларынан бүтүн сааланы сөхтөрбүттэр, хайҕалы ылбыттар. Дьүүллүүр сүбэ чилиэттэрэ Арассыыйаттан тиийбит кыттааччылар бу иннинэ хаһан да 10 бастыҥ бөлөххө киирбэтэхтэрин, онон бу «сюрпризтар» ситиһиилэрэ улахан хамсааһыны таһаарбытын тоһоҕолоон бэлиэтээбиттэр, истиҥник эҕэрдэлээбиттэр.