Ааспыт нэдиэлэтээҕи куйаас күннэр баһаары кытта охсуһааччыларга элбэх эрэйи оҥорбуттара. Иллэрээ күн АН-26Б «Циклон» сөмөлүөт ардахтаах былыты үүрэн аҕалан ардах түстэ.
Ардах баһаары кытта охсуһааччыларга улахан өҥөнү оҥорбута бэлиэтэнэр. Күүскэ умайа турар сирдэргэ түһэн уоту намыраппыт. «Сөмөлүөт былыты үүрэн, ардахтаан, элбэх туһаны таһаарда. Кэлин да бу ньыманы туттуохпут», — диэтэ Ойуур хаһаайыстыбатын департаменын салайааччытытын солбуйааччы Дьулустаан Хон.
От ыйын 16 күнүгэр, ардах кэнниттэн дьыл туругун кэтээччилэр сөмөлүөтүнэн Кэбээйи уонна Нам улуустарын баһаардарын эргийэн көрдүлэр. Түбэ уонна Батамаайы сэлиэнньэтин баһаардара намыраабыттар.
Билигин ардаҕы аҕалар сөмөлүөт ыаллыы сытар эрэгийиэннэргэ үлэлии сылдьар.
Николай Попов, «Саха сирэ» хаһыат, edersaas.ru