Күндү ытык-мааны Сахам сирин олохтоохторо, биир дойдулаахтарым, дьокутааттыыр уокуругум дьоно-сэргэтэ!
Эһигини самаан сайыммыт салаллан кэлбитин уруйдуур Үрүҥ тунах ыһыаҕы ыһар күммүтүнэн итиитик-истиҥник эҕэрдэлиибин! Күөххэ этэҥҥэ үктэммит үөрүүбүт, бу Ыһыахха сайыҥҥы чаҕылхай күммүт курдук сандаарыаҕа. Быйылгы ыһыах куйаар ситимин нөҥүө ыытылларынан уратылаах буолла. Ол аан дойдуга сатыылаабыт дьаҥ-дьаһах түмүгэр итинник быһаарыы ылыллыбыта. Дьэрэкээн салама ыйаан, ыһыах алгыстаах алаадьытын буһаран, кыынньар кымыһы ыймахтаан, үтэһэлээх эмис эти амсайан, хас дьиэ кэргэн аайы бу төрүт үгэспитин салгыахпыт. Хас дьиэ аайы сахалыы иһиттээх сандалы остуол тула эбэтэр ача күөх көбүөрүнэн тэлгэммит тиэргэммитигэр төбүрүөннээн, сахалыы таҥнан, киэргэнэн, олоруохпут. Ааспыт сыллар ыһыахтарын туһунан кэпсэтиэхпит, күүстээх мадьынылары, кус быһый уолаттары ахтыахпыт, ким бэркэ оһуохайдаан, киэҥ түһүлгэни төрүттээбитин саныахпыт, инники олохпутун торумнуохпут…
Быйылгы куйаар ситиминэн ыытыллар ыһыахпытыгар ырыа-тойук бөҕө дьиэрэйиэ, бу ырыаларга сайылык ырыатын ахтылҕана иһиллиэҕэ. Олоҥхо дойдутун олохтоохторо буоларбытынан, ытык олоҥхобутун умнуохпут суоҕа. Бу күн түөлбэ оһуохайа дьиэрэйиэ.
Күндү тапталлаах дьонум-сэргэм! Быйылгы ыһыахпыт Кыайыы 75 сылыгар ааһарынан, бу ытык күнү эмиэ умнумуоҕуҥ. Хас биирдии сэрии толоонугар охтубут уонна эргиллэн кэлэн баран олохтон туораабыт буойуттары ахтан-санаан ааһыаҕыҥ. Билигин биһиги кэккэбитигэр баар сэрии уонна тыыл бэтэрээннэригэр кыһамньыбыт өссө күүһүрдүн.
Куйаар ситиминэн ыһыахтаан баран, кыыдааннаах кыстыкка бэлэмнэнэн, алаастарга, ходуһаларга оттуу киириэхпит. Илии хотууругар күүстээх тиэхиньикэ көмө буолуоҕа. Хас алаас, үрэх сир аайы бөдөҥ бугуллар кэчигирэһиэхтэрэ, арыы тыаларбытыгар сир аһа кытарчы буһуоҕа, сылаас көлүччэлэргэ сөтүөлүөхпүт, ыраас ууну ыймахтыахпыт. Төһө да ыарахан дьаҥ куттала суоһуурун үрдүнэн, санаабытын түһэрбэккэ, бары бэйэбитин уонна чугас дьоммутун харыстаан, доруобуйабытын көрүнэн самаан сайыммытын этэҥҥэ аһарыаҕыҥ. Чэгиэн буолуҥ, күндү дьонум!
Самаан сайыммыт силигилии ситэн турар кэмигэр Үрүҥ тунах ыһыахпыт күнүн өрө көтөҕүллэн, үлэҕэ уонна үөрэххэ үрдүк ситиһиилэрдээх, дьоһун бырайыактардаах көрсүөҕүҥ. Хас дьиэ кэргэн аайы ил-эйэ олохтоннун, үөрүү уонна үтүө сонуннар эрэ арыаллаатыннар. Хас тиэргэн аайытын чыычаах ырыата ыллаатын, дьол-соргу уйаланнын.
Үрүҥ тунах ыһыаҕынан!
Эҕэрдэни кытта Руслан Федотов, Ил Түмэн норуодунай дьокутаата,
СӨ норуотун хаһаайыстыбатын үтүөлээх үлэһитэ.