Сарсыҥҥыттан «Туймаада-Агроснаб» ААУо рефрижератор ааллара хотугу улуустарга хортуоппуйу, оҕуруот аһын уо.д.а. табаары илдьэр айаҥҥа турунуохтара.
«Магдебург» уонна «Михаил Мальчиков» ааллар бастакы рейстэриттэн балаҕан ыйын 3 күнүгэр эргиллибиттэрэ. Кинилэр хотугу улуустарга бурдугу, араас аһы-үөлү, туттар табаары илдьибиттэрэ, кэлэллэригэр 435 туонна балыгы аҕалбыттара. Таһаҕастарын сүөкэнэн, трюмнары сууйан-ыраастаан бараннар, балаҕан ыйын 9 күнүттэн иккис айаннарыгар бэлэмнэммиттэрэ. Бу сырыыга 550 туонна хортуоппуйу уонна оҕуруот аһын, 260 туонна комбикуорманы, 116 туонна араас аһы-үөлү итиэннэ 160 туонна тутуу, ититии матырыйаалларын, олохтоох хаһаайыстыбалар таһаҕастарын илдьиэхтэрэ. Тыа хаһаайыстыбатын бородууксуйатын, күннээҕи олоххо наадалаах аһы-үөлү уонна туттар табаары тиэрдэр ааллары уһук хотугу дойду олохтоохторо бэркэ күүтэллэр уонна «күөх рейстэр» диэн ааттыыллар.
Прокопий Горохов, «Туймаада Агроснаб» ААУо тиэйэр-таһар үлэҕэ салаатын начаалынньыга:
— «Магдебург» уонна «Михаил Мальчиков» аалларынан биһиги бу таһаҕаһы алта улууска: Булуҥҥа, Усуйаанаҕа, Аллайыахаҕа, Абыйга, Аллараа Халымаҕа уонна Орто Халымаҕа тиэрдиэхпит. Ону таһынан, быйыл саҥа ылбыт СПО-826 диэн үһүс аалбытынан Кэбээйигэ, Эдьигээҥҥэ 57 туонна хортуоппуйу, оҕуруот аһын, 198 туонна бурдугу, аһы-үөлү ыытан турабыт.
Раиса Сибирякова, “Саха сирэ” хаһыат, edersaas.ru
Таһаҕаһы тиэнии
Орто Халыма улууһун бэрэстэбиитэлэ Егор Сазонов бурдугу, комбикуорманы тиэйиини хонтуруоллуур
Хотугу дойду олохтоохторугар битэмиин наада