Александр Артемьев: «Күөх Маайынан, ытык-мааны сахам дьоно!»
“Саха сүөһүтэ” генофонднай хааһына тэрилтэтин дириэктэрэ, Бүтүн Арассыыйатааҕы Бааһынай хаһаайыстыбалар уонна кэпэрэтииптэр ассоциацияларын (АККОР) Саха сиринээҕи салаатын бэрэсидьиэнэ Александр Артемьев 1 Маай бырааһынньыгынан эҕэрдэлиир:
— Аан дойду үлэлээн иитиллээччилэрин сомоҕолуур, Үлэ, Саас, Эйэлээх олох, Күөх Маай уонна Улуу Кыайыы бырааһынньыктарынан Сахабыт сирин бары олохтоохторун итиитик-истинник эҕэрдэлиибин!
Биир дойдулаарым, тыам сирин үлэһит дьоно, Эһиги өбүгэлэрбит төрүт дьарыктарын өрө тутан, хороҕор муостааҕы иитэн, сыспай сиэллээҕи үөрдээн, табаны дьиэтитэн, бурдук ыһан, көмүс хатырыктааҕы хоторон, хара тыа күндү түүлээҕин бултаан, кэлэр кэнчээри ыччаттары иитэн-үөрэтэн, тыа сирин сайдыылаах саҥа олоҕун тутаҕыт, саха омук дьылҕатын түстүүгүт, төрөөбүт Ийэ тылбытын тыынныыгыт. Эһиги күннээҕи олоххут, үлэҕит тэрээһинэ барыта онно ананан, чопчуланан кэллэ диэн киэн туттан этэбин! Махтанабын, Эһигинэн киэн туттабын!
Тыам дьоно, биһиги сүрүн сорукпут — олохтоох тыа хаһаайыстыбатын бородууксуйатын оҥоруу тэтимин үрдэтии, бар дьоммутун доруобуйаҕа туһалаах үрүҥ илгэнэн, эмис эт аһынан хааччыйыы, эдэр көлүөнэ дьоннору тыа сиригэр чугаһатыы, олохсутуу, тыа сирин үлэтигэр сыһыарыы. Сахабыт төрүт сүөһүтүн удьуора-утума быстыбатыгар, Ил Дархан Айсен Николаев 2018 сыллаахха тааһарбыт “СӨ тыатын хаһаайыстыбатын сайдыытын кэскиллээх хайысхаларын туһунан“ ыйааҕын олоххо киллэрэргэ үлэлэһиэҕиҥ.
Күндү биир дойдулаахтарым, бүгүҥҥү уустук кэмҥэ коронавирус ыарыыттан бэйэ-бэйэбитин харыстаһыаҕыҥ, бары биир сомоҕо буолан бу ыарыыны түргэнник бохсуоҕуҥ!
Маай бырааһынньыктарынан эҕэрдэлээн тураммын, эйэлээх халлааны, кыстыкпытын этэҥҥэ түмүктээммит, уйгу быйаҥнаах сайын тосхойдун, үрүҥ илгэни үрүлүтэр ыраас ыра санааларбыт туоллуннар, бастыҥ баҕа санааларбыт олоххо киирдиннэр, тыа киһитин олоҕо-дьаһаҕа тубустун диэн Үрдүкү Үрүҥ Айыыларбытыттан көрдөстөҕүм буоллун!
edersaas.ru