Пиэрибэй Маай бырааһынньыгар сир—сир аайы араас тэрээһиннэр ыытыллаллар эбит.
Биир дьикти үгэс Уус Алдан улууһун Бороҕон нэһилиэгэр баар. Ол курдук, бу күҥҥэ олохтоохтор «Сымыыт харсыһыннарыыта» диэн үгэс буолбут оонньууларын тэрийэллэр.
Кыралыын-улаханныын эрдэттэн сымыыт буһарынан, оҥостон, дьон кулуупка мустар. Быйыл да, саамай кырачаан кыттааччы үс саастаах Байдам Алексеевтан саҕалаан, 14 киһи кытынна. «Тыҥааһыннаах» киирсии кэнниттэн, күрэхтэһии-оонньуу кыайыылааҕынан социальнай үлэһит Л.С.Протопопова буолан, «Түмсүү» Сынньалаҥ киинэ олохтуур биир лоток сымыытынан наҕараадаланна.
Бу күрэхтэһии бэйэтэ туспа быраабылалаах. Бастаан «төбөтө», онтон «кэннэ» охсуллар. Иккиэннэрин алдьаттардаххына сымыыккын кыайбыт киһиҥ ылар. Охсоргор кыратык да таарыйдаххына, «сыллаппыккынан»- охсубуккунан ааҕыллар. Бу көр-күлүү аргыстаах оонньууларын олохтоохтор олус сөбүлүүллэр. Хаһааҥҥыттан баар буолбутун бэйэлэрэ да билбэттэр. 60-рын лаппа ааспыт да кырдьаҕастар «оҕо эрдэхпититтэн көрөр оонньуубут» диэн быһаараллар.
—Бороҕон нэһилиэгэр 17-с үйэҕэ бастакы нууччалар кэлэн олохсуйбуттара, кинилэр сыдьааннара Габышевтар, Новоприезжайдар, Халдеевтар, Мордовскойдар, Пирожковтар билигин Тумулга олороллор. Онон, кырдьык да, былыргы төрүттэрбит оонньууларыттан хаалбыта эбитэ дуу.., — диэн сабаҕалыыр олохтоох оскуола учуутала Акулина Сокольникова.
Татьяна Маркова, edersaas.ru