«Бөртө» сылгы собуота» ХЭТ 2015 сыллаахха «Бөртө-Ас» диэн кэпэрэтииби тэриммитэ.
Онон астыыр салаа – үүт сыаҕа итиэннэ симиэнэҕэ уон сүөһүнү өлөрөн астыыр буойуналаах эт сыаҕа бу кэпэрэтиип иһинэн үлэлииллэр, быйылгыттан ыраас ууну кутар сыах аһылынна.
Астыыр сыах Уу Көхсүгэр баар. Биһиги сылдьарбытыгар асчыттар сарсыардааҥы ыам үүтүн «сүүрдэн» бүтэрэн, иһиттэрин-хомуостарын сууйа-сото сылдьаллара. Өссө сопхуос саҕаттан арыы сыаҕар маастардаабыт, хаһаайыстыба биир саамай уопуттаах кырдьаҕас үлэһитэ Варвара Павловна Старостина быйыл эмиэ сайылыгар тахсан маастардаабыт, киниэхэ көмөлөһөөччүнэн Анастасия Анастатова сылдьар эбит.
– Үс сайылыгынан холбоон, күҥҥэ үс туонна үүт ыанар, – диир Варвара Павловна. – Ону барытын сүөгэйдээн, киилэ аҥаардаах иһиттэргэ кутарбытын күн аайы Покровскайынан Дьокуускайга тиийэ илдьэн батараллар. Төһө да кураан буоллар, сайын саамай үүтүгэннээх кэмҥэ күҥҥэ түөрт туонна үүтү астаабыппыт.
«Бөртө» сылгы собуота» ХЭТ сыл саҕаланыаҕыттан 604 туонна үүтү, ол эбэтэр биир фуражнай ынахтан 2 тыһыынча 86 киилэ үүт ыабыт. Хаһаайыстыба биригэдьиир-зоотехнига Ульяна Семенова этэринэн, ынах ахсыттан ортотунан 2 тыһыынча 700 киилэ үүтү ыаннаҕына, хаһаайыстыба сыллааҕы былаанын толоруохтаах.
Раиса Сибирякова, «Саха сирэ», edersaas.ru