«Дьокуускайдааҕы килиэп кэмбинээтэ» ААУо коровируһунан сибээстээн сэрэтэр дьаһаллары күүһүрдэр, кыраапыгын кэспэккэ үлэлиир.
edersaas.ru
Кэмбинээт салалтата пандемияны учуоттаан, алтынньыга диэри туттар бурдугун хааччынан олорор, харантыын кэмигэр бородууксуйа сыанатын төрүт үрдэппэтэ.
Тохсунньу 1 күнүнээҕи туругунан, манна барыта 441 киһи үлэлиир эбит буоллаҕына, пандемия кэмигэр саастаах дьон изоляцияҕа ыытылланар, билигин 374 киһи баар. Үлэһиттэр урут даҕаны санитария-эпидемиология ирдэбиллэрин кытаанахтык тутуһаллара, билигин ону күүһүрдэн биэрдилэр. Үлэҕэ кэтэр анал таҥаһы, халааты таһынан, бары мааскалаах, бэрчээккилээх сылдьаллар, салаа аайы санитайзердар бааллар. Тэрилтэҕэ киирэргэ эмчиттэр хас биирдии үлэһит температуратын мээрэйдииллэр уонна илиини ыраастыыр тэрилинэн сууйтараллар.
Бородууксуйа хаачыстыбатын Людмила Максимова салайар лабораториятын исписэлиистэрэ көрөллөр-истэллэр. Үлэ бары түһүмэҕэр туттуллар тэрил, туһаныллар сырье, уу, бурдук итиэннэ оҥоһуллар бородууксуйа күннэтэ бактериологическай лабораторияҕа бэрэбиэркэлэнэр. Технология сулууспата кислотноһы, сииги, температураны хонтуруоллуур.
Оһохтон тахсар бородууксуйаны химия лабораторията көрөр-истэр, физика-химия көрдөбүллэригэр анаалыстыыр. Оттон хаачыстыба хонтуруола бородууксуйа тас көрүҥэ ирдэбилгэ төһө сөп түбэһэрин көрөр. Ити курдук, элбэх түһүмэхтээх хонтуруолу ааһан, күҥҥэ 36 510 устуука бухаанка килиэп уонна килиэп-буулка оҥоһук астанан, Дьокуускай уонна куорат таһынааҕы бөһүөлэктэр маҕаһыыннарыгар батарыллар.
Ону таһынан, 350 солк. элбэх суумалаах килиэп-буулка аһылыгы атыылаһааччыларга сайаапка быһыытынан дьиэҕэ босхо илдьэн биэрии өҥөтө тэрилиннэ. Курьердар санитарнай ирдэбили тутуһаллар, сакаастары бэрчээккилээх уонна мааскалаах сылдьан толороллор. Бу туһунан Тыа хаһаайыстыбатын минисиэристибэтэ иһитиннэрэр.
Раиса Сибирякова, «Саха сирэ» хаһыат, edersaas.ru