Күбээдики устун кынаттаах хайыһардьыттар сүүрдүлэр

Ааптар: 
Бөлөххө киир:

Таатта улууһун Дэбдиргэтигэр муус устар 3-4 күннэригэр улуустааҕы хайыһар күрэхтэһиитэ Күбээдики диэн сиргэ буолан ааста.

Нэһилиэк Күбээдики диэн алааһыгар хайыһар суолун эрдэттэн бэлэмнээбиттэрэ. Күрэхтэһии эрэ иннинэ халлаан тымныйан, тыалыран, суолу тибэн кэбиспитин туһунан Игидэй орто оскуолатын саха тылын уонна литературатын учуутала Варвара Константиновна Ефимова санаатын үллэһиннэ: «Уопсайа улуус үрдүнэн сэттэ оскуола хамаандата кэлбит. Бу биһиэхэ, олохтоохторго олус долгутуулаах уонна тыҥааһыннаах күннэр аастылар. Дьаҥ кэнниттэн бастакы кэриэтэ улахан, улуус таһымнаах тэрээһиммит буолар. Ол курдук Тааттатааҕы лиссиэй, Туора Күөл, Тыараһа, Уолба, Харбалаах, Игидэй, Уус Таатта орто оскуолаларын оҕолоро мустубуттара. Манна 5-6 кылаастарга кыргыттарга биирдии км, онтон уолаттарга иккилии км сүүрүү, 7-8 кылаастарга 2-3 км, 9-11 кылаастарга 5 км уһуҥҥа хайыһарынан сүүрүү, ону таһынан эстафета ыытыллыбыта. О5олорго маннык күрэхтэһии успуорду таптыырга, эт-хаан өттүнэн сайдалларыгар олус көмөлөөх дии саныыбын”.

Оскуола оҕолоро холоннулар

Тэрээһин аһыллыытыгар Игидэй нэһилиэгин баһылыга Егор Алексеевич Марков, оскуола дириэктэрэ Иннокентий Иннокентьевич Дягилев уонна бэтэрээн хайыһардьыт Софрон Егорович Оросин кыттыыны ылбыттара.

Тыҥааһыннаах киирсии, эккирэтиһии түмүгэр кыра кыргыттарга биир км уһуҥҥа сүүрүүгэ уопсайа аҕыс кыыс сүүрбүтүттэн бастакы, иккис миэстэҕэ Игидэй орто оскуолатын алтыс кылааһын үөрэнээччилэрэ Ариана Лопатина уонна Виолетта Ордахова, үһүс миэстэҕэ Уолба орто оскуолатын алтыс кылааһын үөрэнээччитэ тигистэ. Кыра уолаттарга аҕыс уолтан Игидэй орто оскуолатын 6-c кылааһын үөрэнээччитэ Марат Лопатин, иккис миэстэҕэ Уус Таатта орто оскуолатын үөрэнээччитэ Ньургун Холмогоров уонна үһүс миэстэҕэ Уолба уола Виталий Петров тигистилэр.

Орто саастаах уолаттарга Игидэй орто оскуолатын уолаттара Олег Баннов, Илья Лопатин, Кеша Никифоров бастакы, иккис, үһүс миэстэҕэ тигистилэр. Кыргыттарга уон кыыстан Уус Тааттаттан Лиана Неустроева бастакы, Уолба нэһилиэгиттэн Сайыына Бочурова иккис уонна Мичийэ Неустроева Уус Тааттаттан үһүскэ тигистилэр. оттон улахан уолаттарга Игидэй нэһилиэгин үс уола бастакы, иккис, үһүс миэстэлэри ыллылар: Семен Лопатин, Саарын Ермолаев, Антон Иванов.

Биирдиилээн сүүрүү кэнниттэн хамаанданан эстафета түмүгүнэн Игидэйдэр эрэллээхтик кыайдылар. Иккис миэстэҕэ Уолба хамаандата, үһүс миэстэҕэ Ытык Күөллээҕи лиссиэй хамаандата тигистэ. Төрдүс миэстэҕэ бэрт кыранан хаалан Тыараһалар таҕыстылар. Түмүккэ бастыҥ хайыһардьыт оҕолорго анал бириистэри туттардылар. Ол курдук, Арианаҕа Лопатина уонна Марат Лопатиҥҥа «Инникилээх хайыһардьыт» ааты Игидэй нэһилиэгин ыччатын лиидэрэ Иван Бурмистров туттарда. Маны таһынан күрэхтэһии кэмигэр Игидэй оскуолатын уонна А.Ф.Бояров аатынан норуот айымньытын дьиэтин кэлэктиибэ итии астаах хорчуоппалары тэрийэн үлэлэттилэр.

Хайыһары таптааччылар

Иккис күн аны улахан дьоҥҥо күрэхтэһии буолбута. Бу икки күн устата Игидэй нэһилиэгэр олох күөстүү оргуйан, бүтүн улуустааҕы улахан хайыһар күрэхтэһиитигэр хайыһардьыттар түһүлгэлэрэ тэриллибитэ. Бу туһунан Игидэй нэһилиэгин аҕа баһылыга Егор Алексеевич Марков санаатын үллэһиннэ:

— Биһиги бу тэрээһиммитигэр оскуола эрэ оҕолоро буолбакка, аҕам саастаах дьон икки ардыгар эмиэ хайыһарга улахан күрэхтэһиини тэрийдибит. Уопсайа аҕыс еэһилиэктэн хамаандалар тэриллэн кэллилэр. Хамаандаҕа биирдии бэтэрээн дьахтар, эр киһи уонна эдэрси саастаах дьахтар, эр киһи буолан кытынылар. Маны сэргэ улуустааҕы хайыһар федерациятын бэрэссэдээтэлэ Валентин Андреевич Охотин, успуорт кэмитиэт исписэлииһэ Николай Николаевич Власов ыалдьыттаатылар. Уопсай түмүккэ улахан дьоҥҥо Игидэй нэһилиэгэ бастаата, Ытык Күөл нэһилиэгин хамаандата иккис уонна Туора Күөл хамаандата үһүс миэстэҕэ тигистилэр.

Үгүс киһини түмпүт Күбээдики алааска аны мантан антах үгэскэ кубулуйан улахан тэрээһиннэр ыытыллыахтара турдаҕа. Игидэй нэһилиэгин олохтоохторугар сааскы бастакы тэрээһин бырааһынньык кэриэтэ түмүктэннэ.

Ульяна ЗАХАРОВА.

Попов Г.С, Захарова Л.Н., Ефимова В.К хаартыскаҕа түһэриилэрэ.

+1
0
+1
0
+1
0
+1
0
+1
0
+1
0
+1
0