Өрөспүүбүлүкэтээҕи медиа-кииҥҥэ бүгүн “Саха сирин киэн туттуута” бырайыагынан ыытыллыбыт “Култуура диэйэтэлэ” номинация кыайыылааҕын Августа Федоровна Клакинованы эҕэрдэлээһин ураты истиҥник, өрө көтөҕүллүүлээхтик буолла.
“Култуура диэйэтэлэ” номинацияҕа 16 улуустан, куораттан бастыҥ үлэлээх 22 киһи кыттыбыта. Түмүктүүр куоластааһын тохсунньу 22 күнүгэр буолбута. Ол түмүгүнэн, Сунтаар улууһун Элгээйи сэлиэнньэтигэр “Алгыс” оҕо образцовай үҥкүү ансаамбылын салайар, СӨ култууратын үтүөлээх үлэһитэ Августа Федоровна Клакинова 10 124 куолаһы ылан кыайыылааҕынан тахсыбыта.
Үөрүүлээх чааһы “Сахамедиа” холдинг генеральнай дириэктэрин бастакы солбуйааччы Афанасий Ноев эҕэрдэ тылынан аста. Августа Федоровна үлэтигэр баһылаабыт баай үөрүйэҕин өр сылларга ыччаттарга, оҕолорго тиэрдэ турарыгар баҕарда. Дохсун ытыс тыаһыгар доҕуһуоллатан кыайбытын туһунан туоһу суругу, чороону туттарда.
СӨ култуура уонна духуобунай сайдыы миниистирин солбуйааччы Николай Макаров:
– Бу куоластааһыҥҥа өрөспүүбүлүкэ култуураҕа, искусствоҕа эйгэтин биллэр-көстөр, бас-көс дьоно кытыннылар. Күрэс хара маҥнайгыттан тыҥааһыннаахтык барбыта. Эгил-тэгил киирсии түмүгэр, Августа Федоровна эрчимнээхтик төлө көтөн инники күөҥҥэ тахсыбыта барыбытын улаханнык үөрдэр, долгутар. Ытык-мааны киһибитигэр сиргэ тиийэ сүгүрүйэбит, — диэтэ уонна эҕэрдэ суругу, сибэкки дьөрбөтүн туттарда.
“Саха сирин киэн туттуута” бырайыак эрэдээктэрэ Григорий Фоменко чулуу, бастыҥ үлэһити, ытык киһини көрсүбүтүттэн улаханнык долгуйарын биллэрдэ:
— Улахан күрэскэ тыа сирин үлэһит киһитэ кыайбытыттан ордук улаханнык үөрдүм. Эйиэхэ эдэр ыччат, оҕо эрэлэрэ, дьонуҥ-сэргэҥ өйөбүлэ күүһү-уоҕу, эрчими биэрэ турдун. Үөрэтэр оҕолоруҥ махталлара мэлдьи арыаллаатын, — диэтэ. Бары номинациялар кыайыылаахтарын түмэн эҕэрдэлээһин балаҕан ыйын 27 күнүгэр ыытыллара былааннанарын туһунан иһитиннэрдэ.
Августа Федоровна улаханнык долгуйан туран бар дьонугар махтанна.
– Сахам сирин күндү олохтоохторо, таптыыр Тааттам, сөбүлүүр Сунтаарым дьоно-сэргэтэ, үөрэнээччилэрим, бииргэ үөрэммит доҕотторум, урууларым-аймахтарым, эһиэхэ бука барыгытыгар сүһүөхтээх бэйэм сүгүрүйэн, хоолдьуктаах бэйэм хоҥкуйан туран барҕа махталбын тиэрдэбин. Оҕолору үҥкүүгэ үөрэппитим уонна ону үйэм тухары илдьэ сылдьарым – дьолум, үөрүүм. Мин үҥкүүһүт, үҥкүүнү үөрэтээччи буолан тураммын, үлэлээбит сылларбын бүүс-бүтүннүү санаан эргиллэн көрдөхпүнэ, идэбин саамай сөпкө талбыт эбиппин диэн олус-олус үөрэбин, — диэтэ итиэннэ бу бырайыак салҕанан бара турарыгар, өссө кэҥииригэр, сайдарыгар, бар дьон биһирэбилин ыларыгар баҕарда.
Бүгүҥҥү үөрүүлээх эҕэрдэлээһин Дьокуускайга Сунтаар улууһун күннэрин чэрчитигэр сөп түбэһиннэрэн ыытыллыбыта ордук табылынна. Түһүлгэҕэ ытык киһиэхэ истиҥ тылларын тиэрдэ ыраахтан-чугастан үөлээннээхтэрэ, бииргэ устудьуоннаабыт дьүөгэлэрэ, Сунтаарга, Тааттаҕа үҥкүүгэ уһуйбут уонна уһуйар оҕолоро, ыччаттара, икки өртүттэн дойдулаахтара мустан истиҥ эҕэрдэлэрин тиэртилэр, таптыыр учууталларын үөрүүтүн үксэтистилэр, сибэкки дьөрбөтүн бэлэхтээтилэр, кэрэ кэмнэрин ахтан-санаан аастылар, тапталлаах учууталларыгар махтаннылар.
“Куйаар ситиминэн барбыт үтүө-мааны күрэскэ ытык-мааны киһибитин Августа Федоровнаны бүттүүн сомоҕолоһон куоластаан талбыппытынан үөрэбит. Үҥкүү бастыҥ хотуна Августа Федоровна бу үрдүк ааты ылыан ылла” , — диэн түһүлгэҕэ мустубут бары ыалдьыттар уруй-айхал эттилэр.
* * *
Августа Федоровна Клакинова Таатта улууһугар “Доҕордоһуу” оҕо үҥкүүтүн норуодунай ансаамбылын төрүттээбитэ, сатабыллаахтык салайбыта, аар саарга аатырдыбыта. Сунтаарга тиийиэҕиттэн Элгээйигэ “Алгыс” оҕо үҥкүүтүн образцовай ансаамбылын үрдүк ситиһиилээхтик салайар. «Алгыс» чаҕылхай үҥкүүлэрин бар дьон сөҕө-хайгыы көрөр.
Сардаана БАСНАЕВА, “Саха сирэ” хаһыат, edersaas.ru