Бүгүн, олунньу 15 күнүгэр, Карелия баһылыга Александр Худилайнен дуоһунаһыттан баҕа өттүнэн уурайара күүтүллэр. Бу туһунан МК.RU Кремльтэн кэлэр информацияҕа сигэнэн иһитиннэрэр.
Роман Попов, “Саха сирэ” хаһыат, https://edersaas.ru
Ону бигэргэтэрдии, оптуорунньук күн Рязань күбүрүнээтэрэ Олег Ковалев үлэтиттэн “көһүтүллүбүт” уурайыыта буолла. Ол эмиэ РФ бэрэсидьиэнин дьаһалтатын салайааччытын солбуйааччы Сергей Кириенко “фирменнэй стилинэн” оҥоһуллубутун суруналыыстар бэлиэтииллэр: сарсыарда күбүрүнээтэр уурайарын туһунан иһитиннэрэр, күнүстэн киэһэ кини оннугар олорооччу киһини кытта Владимир Путин көрсөр. Бэрэсидьиэн пресс-сэкирэтээрэ Дмитрий Песков бу нэдиэлэ бастакы аҥаарын бэрэсидьиэн регионнарга аныаҕын туһунан иһитиннэриитигэр олоҕуран, суруналыыстар бу сэрэдэҕэ Карелия баһылыга Худилайнен дуоһунаһыттан уурайыаҕын сылыктыыллар.
Санатар буоллахха, тохсунньу 12 күнүгэр Адыгея баһылыга Аслан Тхакушинов баҕа өттүнэн уурайбыта. Ааспыт нэдиэлэҕэ Бурятия уонна Пермь уобалаһын күбүрүнээтэрдэрэ үлэлэриттэн тохтообуттара. Бу бэнидиэнньиккэ Дмитрий Песков бэрэсидьиэн регионнары кытта салгыы үлэлиэҕэ диэн этиитин дуораана сүтэ илигинэ, аны Новгород, Рязань баһылыктара утуу-субуу уурайалларын туһунан иһитиннэрбиттэрэ.
Дьиктитэ диэн, олор бары үүт-үкчү сценарийынан бараллар: сарсыарда күбүрүнээтэр пресс-кэмпириэнсийэҕэ уурайарын туһунан этэр, онтон күнүстэн киэһэ бэрэсидьиэн кини оннугар ананыахтаах бэлэмнэниллибит киһини кытта көрсөн кэпсэтэр.
Дмитрий Песков Кремльгэ ханнык да “хара испииһэк” суоҕун, уурайбыттар бары баҕа өттүлэринэн сайабылыанньа суруйбуттарын, Владимир Путин кинилэр үлэлэрин хаста да хайҕаан турардааҕын бэлиэтээн эттэ, уонна бу буолаары турар бэрэсидьиэн быыбарын кытта туох да сибээһэ суоҕун ыйда.
Александр Худилайнен.
Оттон Александр Худилайнен дьылҕатыгар тохтоотоххо, күбүрүнээтэр 11 чыыһылаҕа Москваҕа сылдьан номнуо уурайарын туһунан сайабылыанньа суруйбут, олохтоох чунуобунньуктар олунньу 22 күнүгэр барар банкетыгар ыҥырыы туппуттар. Ити туһунан Карелия СМИ-лэрэ иһитиннэрэллэр. Бэл кини оннугар ким ананыаҕын билбиттэр. Саҥа күбүрүнээтэринэн суут приставтарын федеральнай сулууспаларын дириэктэрэ Артур Парфенчиков ананыаҕа үһү диэн буолар.
Роман Попов, “Саха сирэ” хаһыат, https://edersaas.ru