Бэрт соторутааҕыта эрэ “InDriver” сыһыарыыны айан, кэлии-барыы өҥөтүн эрэ быһыытынан билинэрбит. Билигин «InDriver» кэҥээн-тэнийэн араас өҥөнү барытын оҥорор буолла. Ол курдук, сыһыарыы элбэх дьоҥҥо туһалаах хайысхатын кэскиллээх эдэр дьон Андрей Босиков уонна Семен Алексеев салайар буоллулар.
Андрей Босиков уонна Семен Алексеев иккиэн Мэҥэ Хаҥалас Майатыттан төрүттээхтэр. Иккиэн Майатааҕы гимназияны бүтэрбиттэр. Семен 2015 cыллаахха Арктикатааҕы судаарыстыбаннай култуура уонна ускуустуба институтун, онтон 2017 сыллаахха СӨ Ил Дарханын иһинэн Инновация менеджменин үрдүкү оскуолатын бүтэрбит. Андрей 2015 сыллаахха ХИФУ инженернэй-техническэй институтун бүтэрбит. Иккиэн “Ый суола” рок-бөлөххө оонньууллар. Билигин өрөспүүбүлүкэбит тэбэр сүрэҕэр — Дьокуускай куоракка таһаарыылаахтык үлэлии-хамсыы сылдьаллар.
«JobJob» диэн араас өҥөнү оҥорор платформаны төрүттээн, хайдах «Indriver» сыһыарыыга кэлбиттэрин туһунан Семен Алексеев кэпсиир:
— Икки үрдүк үөрэҕи бүтэрэн баран үлэ булбакка сылдьыбытым. Ол сылдьан кыра маҕаһыын арыйбытым уонна доҕотторбун кытары быстах кыра үлэлэри көрдөөн булан үлэлиир этибит. Биир үтүө киэһэ өҥө көрдүүр уонна өҥө оҥорор дьону биир сиргэ түмэр платформа наада эбит диэн санаабыппыт, онтон саҕалаан»JobJob» айыллыбыта. Андрей Босиков диэн доҕорбор кэпсээбитим уонна ылсан үлэлиэх диэн этии киллэрбитим. Андрей өр толкуйдаакка сөбүлэспитэ. Ол курдук тэриллэн үлэлээн киирэн барбыппыт.
Мин Андрей Босиковтыын тэрийээччи уонна салайааччы, тиэхиньикэ өттүн дириэктэрэ Айсен Федоров уонна оҥорооччу Алексей Баишев буолан үлэлээбиппит. Судургу күннээҕи олоххо туһаныллар дьиэ өҥөлөрүттэн, дьиэ өрөмүөнүттэн саҕалаан көмпүүтэр өҥөлөрүгэр тиийэ наадыйар дьон туһаналлара.
«Индрайвер» сыһыарыы дириэктэрин, салайааччытын Арсен Томскайы кытары “Смарт” диэн ИТ-сайдыытын киинигэр 2019 сылга билсибиппит. Салгыы «Фейсбук» ситимин нөҥүө кэпсэтэр этибит. Ол кэпсэтиилэргэ “Индрайвер иһигэр атын өҥөлөрү оҥорор уонна ол өҥөлөрү туһанар дьоҥҥо анаан сервис оҥороору гынабыт” диэн этэр этэ. Ол курдук ити санаа итинник хаалбыта, күн-дьыл ааһан испитэ. Арай, биир үтүө сарсыарда төлөпүөнүм тыаһаабытын ылан: “Эһиги биһиэхэ, Индрайвер өҥөлөрүн сайыннарыаххытын баҕарбаккыт дуо? Сөбүлэһэргит буоллар олус бэрт буолуо этэ”, — диэн тыллары истэн соһуйан эрэ хаалбыппыт. Ол кэнниттэн мустан уһаты-туора толкуйдаан, сүбэлэһэн баран сөбүлэспиппит. Аан дойду дьонугар туһалааҕы оҥоруохпут диэн эрэнэбит”.
Надежда Ильина, edersaas.ru