От ыйын 21 күнүгэр Саха Өрөспүүбүлүкэтин Ил Дарханын иһинэн үлэлиир Олоҥхо национальнай тэрийэр кэмитиэтин мунньаҕа буолла.
Мунньаҕы Олоҥхо национальнай тэрийэр кэмитиэтин салайааччыта, СӨ Ил Түмэнин Бэрэссэдээтэлин бастакы солбуйааччы Александр Жирков ыытта. Көрүллүбүт боппуруостар — төрүт үгэстэри илдьэ сылдьааччылары өйүүр миэрэлэр уонна 2023 сылга Өймөкөөн улууһугар ыытыллар Олоҥхо ыһыаҕын тэрийэр боппуруостарын дьүүллэһии.
Олоҥхо Ыһыаҕын тэрийиигэ бэлэмнии туһунан Өймөкөөн улууһун баһылыга Иннокентий Сивцев иһитиннэрдэ.
Сонун сүүрээннэр
Олоҥхо ыһыаҕын чэрчитинэн ыһыах устуоруйатыгар Өймөкөөҥҥө аан бастаан сылгыһыттар уонна аҕыйах ахсааннаах төрүт омуктар култуураларын бэстибээллэрэ ыытыллара былааннанар. Суолталаах тэрээһиҥҥэ Уһук Илин федеральнай уокуруттан: Бурятияттан, Забайкалье, Приморье, Хабаровскай, Камчатка кыраайдартан, Магадаан, Амур, Сахалин уобаластарыттан, Чукотскай автономнай уокуруктан уонна Саха сирин арктическай оройуоннарыттан кэлэн кыттыыны ылыахтара.
Ыалдьыттарга өймөкөөннөр 1-кы гильдиялаах меценат-атыыһыт Н.О.Кривошапкин мусуой-дьиэтигэр, А.Е.Кулаковскай-Өксөкүлээх Өлөксөй оҥотторбут сэргэлэрин, Эбэ Хайаҕа баар Чысхаан резиденцията курдук муус-хаар хайа хаспаҕын, Санта Клаус дьиэтин көрдөрөр соруктаахтар.
СӨ култуура нэһилиэстибэтин харыстыыр эбийиэктэр дэпэртээмэннэрин салайааччыта Николай Макаров историческай эбийиэктэри чөлүгэр түһэрэр үлэни ыытыыга эспиэрдэри уонна методистары көмөҕө биэрэрин иһитиннэрдэ. Маныаха сыһыаннаан атырдьах ыйыгар Өймөкөөҥҥө көһө сылдьар мунньах буолуоҕа.
Халыма-Индигиир улуустара Олоҥхо ыһыаҕар кыттыылара
Бу боппуруос билигин да аһаҕас турар. Александр Жирков ыһыах хоту улуустары түмэ тардыан наада диэн эттэ. Маннык улахан суолталаах тэрээһин ыраах сыталларынан сибээстээн, Халыма-Индигиир улуустарыгар ыытыллыбата чахчы. Боппуруоһу Ил Дарханы кытта мунньахха сиһилии ырытан баран, олохтоох быһаарыыны ылыахтара.
Түмүк боппуруостар
Улуус баһылыга Иннокентий Сивцев 2023 сылга Томторго ыытыллар ыһыаҕы күн-дьыл усулуобуйатынан сибээстээн, от ыйын 1 уонна 2 күннэригэр ыытар гына көрдөстө.
Олоҥхо ыһыаҕын ыалдьыттарын көрсүүгэ араас хаартыска зоналара, рекреациялар, тцристическай машруттар, Өймөкөөн кэрэ айылҕатын хартыыналара киэргэтиэхтэрэ.
СӨ Ил Дарханын иһинэн үлэлиир «Олоҥхо» тэрийэр кэмитиэтин салайааччыта Александр Жирков Олоҥхо ыһыаҕа үгэс быһыытынан улуус киинигэр буолбакка, Томтор нэһилиэгэр ыытылларын өйүүрүн биллэрдэ: «Былыр былыргыттан тыа сирин нэһилиэктэрин түмэр Томтор, саха культууратын сирэйдиир духуобунай киин буолара чахчы».
Елена ПОТОЦКАЯ, «Саха сирэ» хаһыат.