Бу күннэргэ Өймөкөөн улууһун муниципалитетын дьаһалтата уонна үөрэх управлениетын салалтатын тэрийиилэринэн Ыччат сылыгар аналлаах «Мин — баһылыкпын» диэн улуустааҕы куонкурус буолан ааста.
Елена ПОТОЦКАЯ, «Саха сирэ» хаһыат, edersaas.ru
Көхтөөх тэрээһиҥҥэ улуус бары нэһилиэктэриттэн 16-тан 35-гэр диэри саастаах ыччат кэлэн кытынна. Өймөкөөн улууһун биэс муниципальнай тэриллиитин социальнай-экономическай сайдыытыгар туһуламмыт боппуруостарга ыччаттартан бэрт үгүс интэриэһинэй этиилэр киирдилэр.
Ол курдук, 1-кы миэстэни ылбыт Уус-Ньара бөһүөлэгин 2-с хамаандата Төрүт нэһилиэгин сайдыытыгар туһуламмыт бырайыагын көмүскээтэ. Ыччаттар Быйыттаах учаастагар агропромышленнай кластеры тэрийэргэ этии киллэрдилэр. Манна сүөһү тутуутуттан саҕалаан, оҕуруот аһын үүннэриигэ, туризмы сайыннарыыга тиийэ толкуйдаабыттар. «Тылтан — дьыалаҕа» санаанан салайтаран, «Северная бурёнка» диэн «Тарын» кэпэрэтиип сыаҕар маннык арыыны оҥорон атыылыахха сөп диэн бородууксуйа бэлэмнээн көрдөрдүлэр. Ити курдук, хамаандалар Аартык промышленнай бөһүөлэги уонна аҕыйах ахсааннаах омуктар түөлбэлээн олорор Үчүгэй нэһилиэктэрин сайдыыларыгар туһуламмыт бырайыактары көмүскээтилэр.
— Дьыалабыай оонньуу 7 кыайыылааҕа улуус дьаһалтатыгар каадыр резервэтигэр киирдэ. Кинилэр тутуспутнан кулун тутар бүтэһигэр ыытыллыахтаах өрөспүүбүлүкэтээҕи «Миниистир» оонньууга кыттыахтара, — диэн санаатын үллэһиннэ муниципалитет баһылыга Михаил Захаров.
Елена ПОТОЦКАЯ, «Саха сирэ» хаһыат, edersaas.ru