Сэтинньи бүтүүтүгэр өрөспүүбүлүкэ табаһыттара Өймөкөөҥҥө мунньахтыахтара, кэскиллээх үлэ былаанын торумнуохтара.
edersaas.ru
Быйыл Хаҥалас улууһугар Ил Дархан Айсен Николаев тыа хаһаайыстыбатын үлэһиттэрин кытта көрсүбүтэ. Онно өрөспүүбүлүкэ табаһыттарын түмэр көһө сылдьар мунньаҕы тэрийии туһунан кэпсэтии буолбута. Ол тэрээһин кэнниттэн Арктика Госкомитетын бэрэссэдээтэлэ Прокопий Николаев Өймөкөөн улууһун баһылыга Михаил Захаровы көрсөн: «Көһө сылдьар мунньаҕы Өймөкөөҥҥө тэрийдэххэ хайдаҕый? Толкуйдаар дуу», — диэн этии киллэрбитэ.
Бу күннэргэ Арктика Госкомитетын бэрэссэдээтэлэ Прокопий Николаев уонна Өймөкөөн улууһун баһылыга Михаил Захаров көрсөн, бу суолталаах тэрээһин туһунан кэпсэттилэр.
— Мин олохтоохтук толкуйдаан, ырытан баран, кинини кытта көрсүһүүгэ бэйэм утары этиилээх тиийэн, икки өттүттэн дириҥ ис хоһоонноох кэпсэтии таҕыста. Ол маннык. Өрөспүүбүлүкэтээҕи «Зима начинается с Якутии» кыһыҥҥы туризм бэстибээлэ Томторго баар Тымныы хаһаайына Чысхаан резиденциятыттан саҕаланара үгэскэ кубулуйда. Быйыл бу улахан тэрээһиҥҥэ өрөспүүбүлүкэтээҕи Олоҥхо тыйаатыра кыттыыны ылара былааннанар. Ол онно өрөспүүбүлүкэтээҕи табаһыттар көһө сылдьар киэҥ ыҥырыылаах мунньахтарыгар кэлбит ыалдьыттар кыттыахтара. 20 улуустан иккилии дэлэгээт кэлиэх курдук. Ити бэйэтэ 40 киһи. Онно эбэн кэбис бэстибээл кыттыылаахтарын, суруналыыстары, ыалдьыттары. Бэйэтэ сүүсчэкэ киһи. Саха сирин тымныытын этинэн-хаанынан билэ сылдьар киһи табаһыт буоллаҕа! Онон бу суолталаах тэрээһин — Чысхаан Тымныы символын Эбэ Хайаттан таһааран, Саха сиригэр, бүтүн Арассыыйаҕа Кыһыны аҕалар түгэнэ умнуллубат өйдөбүлүнэн буолара саарбаҕа суох. Бу улахан событие таба иитиитинэн дьарыктанар дьон Өймөкөөн курдук хоту дойдуга — Тымныы полюһугар кэлбиттэрин туоһулуоҕа. Онон сэтинньи 25 күнүгэр ыытыллара былааннанар табаһыттар көһө сылдьар мунньахтара быйылгы сылга Саха сиригэр буолар улахан далааһыннаах тэрээһиннэртэн биирдэстэринэн буолуоҕа, — диэн кэпсиир МТ баһылыга Михаил Захаров.
Онон сэтинньи ыйга табаһыттар көһө сылдьар мунньахтарын Өймөкөөҥҥө ыытан, Чысхаан Кыһын символын туттарыытыгар кыттыыны ылыахтара.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.