Маны аах Уопсастыба

Өймөкөөҥҥө Төрүт кырдьаҕастара сэргэх олохтоохтор

Аҕам саастаах дьон күннэринэн сибээстээн Өймөкөөн улууһун кииннэммит бибилитиэкэтэ ырыа, хоһоон куонкуруһун ыыппыта.

Онно Төрүт нэһилиэгин бибилэтиэкэрэ Нина Чачуа куонкуруска кыттыан баҕалаах кырдьаҕастары кытта эрдэттэн кэпсэтэн, сөбүлэҥнэрин ылан баран, кинилэргэ дьиэлэригэр тиийэн устубута уонна Уус-Ньараҕа ыыппыта.

Бу күннэргэ түмүк тахсан, актыбыыс үлэ бэтэрээннэрэ Ульяна Слепцова, Николай Захаров, Афанасий Гермогенов-ГАС, Анна Слепцова араас номинацияларга кыайыылааҕынан тахсан, улуус баһылыга Иннокентий Сивцев анал бириистэрин туттулар. Нина Григорьевна бэтэрээннэригэр тиийэн наҕараадаларын туттартаан, нэһилиэк кырдьаҕастарын олуһун үөртэ.
Сцена бэтэрээнэ Николай Захаров : «Дьиэҕэ олорор дьону бибилэтиэкэрбит Нина Чачуа араас тэрээһиннэргэ кытыннаран абырыыр. Онон олоҕу кытта тэҥҥэ хаамсан иһэбит«, — диэн санаатын үллэстэр.
Ити курдук, Тымныы полюһун ытык кырдьаҕастара куйаар ситиминэн ыытыллар тэрээһиннэргэ өрүү кыттар буоланнар, туох ыытылларын үөрэ кэтэһэр буоллулар.

Елена ПОТОЦКАЯ, «Саха сирэ» хаһыат

0
0