Маны аах Уопсастыба

Өймөкөөн Төрүтүгэр суол алдьанан, кыра оҕолоох дьон оҥочонон туораатылар

Быйыл сайын от ыйыгар Өймөкөөн улууһун Төрүт нэһилиэгин олохтоохторун айылҕа  икки иэдээнэ — ойуур баһаара нэһилиэктэригэр киирээри уонна хас да күн ардаан, аны халаан уута тахсаары куттуу сырытта. 

Хата, барыта этэҥҥэ ааста эрээри, хайа сүүрүүктээх уута Көһөр үрэх суолун турбаларын тоҕо анньан, суолу сууйан кэбистэ.

Инньэ гынан чэппиэргэ улуус баһылыга Иннокентий Сивцев «Поиск Золото» көмүс хостуур  вахтовкатын көрдөһөн, икки өттүттэн хаайтара сытар дьон кыһалҕаларын быһаарда.

Мин оҕолорбун уонна саҥа күн сирин көрбүт сиэммин кытта алтыа буолан Дьокуускайтан Уус-Ньараҕа кэлэн хаайтаран олорбуппут. Барҕа махталбытын улууспут баһылыгар Иннокентий Сивцевкэ уонна «Поиск Золото» АУо салайааччытыгар  Андрей Каздобиҥҥа тиэрдэбит. Кинилэр вахтовка  ыытан, ыксаллаах кэммитигэр өйөөн абыраатылар.

Иннокентий Семенович быйыл сайыны быһа төрүттэргэ көмөлөһөн, олохтоохтору кытта бэйэтинэн батсаабынан билсэ олордо. Ол, биллэн турар, дьон санаатын наһаа көтөхтө. 

 Аны Көһөр үрэххэ кыра айанньыттарбытын сиэтэ сылдьар, кыһыл оҕолоох дьон эрэйэ суох туоруурбутугар анаан муоста оҥорбуттарыттан сөхтүбүт да, махтанныбыт да. 

Нэһилиэкпит баһылыгын солбуйааччы, эдэр салайааччы Алексей Кондаков биир дойдулаахтарын кыһалҕаларын өйдөөн, эр дьону түмэ тардан, уустук балаһыанньаттан тахсар суолбутун тобулбутугар истиҥ махталбытын тиэрдэбит, — диэн нэһилиэк бэрэстэбиитэллээх уорганын дьокутаата Уруйдаана Егорова санаатын үллэһиннэ.

Улуус киинигэр бараары хаайтарбыт Варвара Мордовская эмиэ  биир дойдулаахтарыгар махталын тиэртэ:

—   Айан дьонугар барыбытын бэйэлэрин тиэхиньикэлэринэн аҕалан атаарбыт Александр Атласовка, Гаврил Егоровка, Иван Аргуновка, Николай Мордовскойга, Андрей Петровка махтанабыт.   Кинилэр өссө оҕолоох уонна кырдьаҕас дьон туоруулларыгар муоста оҥорон биэрдилэр, оттон таһаҕастарбытын эрэһиинэ тыынан туораттылар.

… Ити курдук, төһө да сайыны быһа баһаары утары охсуһан сылайбыт нэһилиэк эр дьоно аны  күүстээх сүүрүүктээх хайа уутуттан эмсэҕэлээбит айан суолунан дьону туоратыыга үлэлээтэ.

Бу күннэргэ нэһилиэк эр дьоно түмсэн, аны айан суолун чөлүгэр түһэриигэ бэйэлэрин баҕаларынан тиийэн үлэлии сылдьаллар. Суолбут хаһан олохтоохтук оҥоһуллара биллибэт. Онон быстах айан суола биһиэхэ олус наада. Бу күннэргэ олохтоохтор үгүстэрэ уоппускаттан төннөн, үөрэнэ барар ыччаттарбыт куораттаан эрэллэр, — диэн олохтоох дьаһалта салайааччыта Алексей Кондаков иһитиннэрдэ. Алексей Григорьевич нэһилиэк төрүт олохтооҕо буолан, дьону тылыгар киллэрэн, бу уустук кэмҥэ нэһилиэк хорук тымырын — айан суолун оҥорорго көҕүлээбитин көрө сылдьан, дьоно-сэргэтэ махтанар.

 

Елена ПОТОЦКАЯ, “Саха сирэ” хаһыат, edersaas.ru

 

Хаартыска — Уруйдаана Егорова, Варвара Мордовская түһэриилэрэ.

 

 

1
0