Бүгүн сарсыарда сарсыарда Өймөкөөн бириэмэтинэн 9 ч.20 мүн. Томторго Италия марафонеһа Паоло Вентурини сүүрүүтүн саҕалаан баран, олохтоохтор этэллэринэн 40 км 3 ч. 35 мүн. сүүрэн түмүктээтэ.
edersaas.ru
Бу чааска бу бастакы барыллаан иһитиннэрии. Биллэн, турар, бастакынан батсаап сонуна тарҕанар. Онон бастакы сонуну олохтоохтор миэстэтитттэн тарҕаталлара ордук күндү уонна «буруолуу» сылдьар хаартыскаларынан бигэргэтэр буолан, олохтоох даҕаны.
Бу сарсыарда араас омугу көрсө үөрүйэх томтордор «Арчы» дьиэтигэр 53 саастаах полиция полковнигын сиэри-туому тутуһуннаран, арыылаах алаадьынан оһохторун аһатан, алҕаан ыыттылар.
Өймөкөөн олохтоохторо 40 км сүүрбүт Вентуринины «олох метеор» эбит диэн сүрэхтээтилэр.
«Иккитэ тохтоон уу испит үһү…
Молдовец 5-6 чааска «стартаан» баран, күнүс 13 чааска кэлбитэ. Кинини киһи, кырдьык, итэҕэйиэх курдук…
Таҥаһа да үчүгэйэ бэрт эбит, туох да буолбатах; Ис таҥаһа барыта кырыа, барахсан ыалдьара буолуо…
Бастакы киһи кырдьык дьоруой эбит эрээри, кинини итинник көрсүү суоҕа…». Бу курдук олохтоохтор батсаапка кэпсэтэ олороллоро, туһугар, бэйэтэ пресс-кэмпириэнсийэ буолла.
Гидрометео киин биллэрбитинэн, бүгүн Өймөкөөҥҥө -50 кыраадыс тымныы. Олохтоохтор этэллэринэн, бу — «быдан сылаас» .
Полиция майора Паоло Вентуринины Өймөкөөннөөҕү Ис дьыала отделын үлэһиттэрэ анаан кэлэн алҕаатылар уонна өйдөбүнньүк бэлэх туттардылар.
Паоло Вентурини халыҥ хамаандатыгар Италия университетыттан эмчиттэр, ХИФУ-тан тылбаасчыт уонна Ыксаллаах быһы-майгы сулууспатын үлэһиттэрэ арыаллыы сылдьаллар. Ону тэҥэ омук сирдэриттэн, Арассыыйаттан уонна Саха сириттэн судаарыстыбаннай уонна ааттаах-суоллаах чааһынай телеханааллар суруналыыстара уонна оператордара Италия марафонеһа Тымныы полюһугар — Өймөкөөҥҥө сүүрүүтүн сырдаталлар.
Онон миэстэтиттэн Тымныы полюһуттан — Өймөкөөнтөн кэлбит бастакы «буруолуу» сылдьар сонун маннык. Мантан киэһэ ыҥырыа уйатын тоҕо тарпыттыы Саха сириттэн саҕалаан, Арассыыйа уонна омук сирдэрин телеханааллара, интернет-таһаарыылара Паоло Вентурини сүүрүүтүн сенсация быһыытынан биллэриэхтэрэ, көрдөрүөхтэрэ, кэпсиэхтэрэ.
Оттон кини «фиништээбитин» өрөспүүбүлүкэҕэ бастакынан «Саха сирэ» хаһыат «Эдэр саас» саайтын ааҕааччылара биллилэр.
Елена ПОТОЦКАЯ, «Саха сирэ» хаһыат, edersaas.ru
Хаартыска — батсааптан.