Сайыҥҥы халаан оттооһуҥҥа уустук балаһыанньаны үөскэтэн, Өймөкөөн улууһун дьаһалтата ыксаллаах быһыыны-майгыны биллэрэн, Тыа хаһаайыстыбатын министиэристибэтигэр комбикормаҕа сайаапка түһэрбитэ уонна отчуттарга көмөлөһөргө устудьуоннар этэрээттэрин ыытарга кэпсэппитэ. Онон ааспыт нэдиэлэҕэ Дьокуускайтан отут байыастаах устудьуоннар этэрээттэрэ кэллэ.
Билигин нэһилиэктэринэн мобильнай биригээдэлэр тэриллэ сылдьаллар. Тыа хаһаайыстыбатын управлениетын экэнэмииһэ Инна Яковлева иһитиннэрэринэн, бу биригээдэлэри тэрийэргэ судаарыстыба бүддьүөтүттэн 325 тыһ. 992 солк. көрүллүбүт. Былааннарын таһынан оттообуттарын нэһилиэнньэҕэ атыылыыр буоллахтарына, кинилэргэ хас туонна от ахсын 3 тыһ. 259 солк. бэриллэр эбит. Маннык дьаһал отчуттары интэриэстииргэ олохтоммут. Эрдэ ыытыллыбыт үлэ түмүгүнэн 70 туонна комбикорм, 70 туонна эбиэс аҕалыллара күүтүллэр, ол иһин сүөһүлээх ыаллартан сайаапка уонна харчы хомуйуллар.
Кыстыгы көрсө Өймөкөөн улууһа 5 тыһ. туонна оту отуур соруктаах. Тыа хаһаайыстыбатын управлениетын чахчытынан, 1 тыһ. 894 туонна от кэбиһиллэн, былаан 37,9 % толорулунна. Кыстыыр отторун Иккис Бороҕон нэһилиэгэ 42,6 %, Сордоҥноох 39 %, Өймөкөөн 36,5 %, хааччыннылар. 450 туонна оту соҕотуопкалыыр былааннаах төрүттэр 119 туоннаны, 350 туонна былааннаах үчүгэйдэр 97 туонна оту кэбистилэр. Мантан күһүн улууска оттооһун өссө күүһүрэр.
Уус Ньараттан Любовь Кривошапкина, «Саха сирэ» edersaas.ru.