Өймөкөөн улууһугар кураан дьыл буолан, ойуур баһаарыгар эбии аны тиит маһы үөн сиэн, от ыйын саҥатыттан саҕалаан, тииттэр хагдарыйан барбыттара.
Экология миниистирэ Сахамин Афанасьев Өймөкөөн улууһун Төрүт нэһилиэгэр кэлиитигэр олохтоохтор кинини кытта анаан көрсөн, тыаны биллибэт үөн хагдарыппытын туһунан кэпсээбиттэрэ.Онуоха Сахамин Миланович санаатын маннык үллэстибитэ:
— Ити «пилильщик» диэн тиит маһы ыарытар үөн. Ойууру көмүскүүр, эмтиир тэрилтэлээхпит. Онон тустаах исписэлиистэр Ойуур хаһаайыстыбатын тэрилтэтин кытта бу үөнү үөрэтиэхтэрэ. «Пилильщик» биир сиргэ турбат, көһө сылдьар. Бу үөн маһы хагдарыппытын кэнниттэн, эһиилигэр мас тыллар. «Шелкопряд» курдук өлөрбөт. Онон тустаах аакталары оҥорон, бу үөнү үөрэтиэхпит, учуонайдар санааларын истиэхпит. «Эмтээҥ» диэтэхтэринэ, эмтиэхпит. Бу күннэргэ «шелкопряд» ыспыт Нам, Хаҥалас улуустарыгар, Дьокуускай куоракка ойууру эмтии сылдьабыт. Оттон эһиил хагдарыйбыт тиит мастар хаттаан тыллалларыгар эрэнэрбитигэр тиийэбит.
Елена ПОТОЦКАЯ, «Саха сирэ» хаһыат, edersaas.ru