Өймөкөөҥҥө ойуур баһаарыгар эмсэҕэлээбит оптоволокно лиинийэтин чөлүгэр түһэрэллэр

Бу күннэргэ «Импульс» НПО үлэһиттэрэ Өймөкөөн улууһун нэһилиэктэригэр оптоволокно сибээһигэр баар мэһэйдэри туораталлар, баһаартан эмсэҕэлээбит лиинийэни чөлүгэр түһэрэллэр.

«Импульс» НПО генеральнай дириэктэрин  сүбэһитэ Георгий Тирон бэлиэтииринэн, бары өҥө улууска кэмигэр оҥоһуллар.

— Үлэһиттэрбин кытта түүннэри-күннэри “Халыма” трассатыгар хоно сылдьан, оптоволокно лиинийэтэ туох да хааччаҕа суох үлэлиирин хааччыйабыт. Нэһилиэктэргэ үлэлээн баран, сотору Уус-Ньараҕа тиийиэҕим. Онно “Аэропорт” түөлбэтигэр суотабай     оператордар ыстаансыйаларын тус-туспа туочукаларынан арааран үлэлэтэр  башняны тута сылдьабыт. Улуус киинигэр сибээс мөлтөҕүн бэлиэтииллэр. Төлөпүөн уонна интэриниэт мөлтөөбүтүн төрүөтэ оптоволоконнай ситим ноҕоруускатыттан да буолуон сөп. Онон онно миэстэтигэр тиийэн үлэлээтэхпитинэ быһаарыахпыт.

Бүгүҥҥү күҥҥэ саамай уустук балаһыанньа Орто Балаҕан нэһилиэгэр – онно сибээс суох. Ойуур баһаара лиинийэни сиэбит. Ону өрөмүөннүүр биригээдэ оҥоро сылдьар. Сэтинньигэ бу эҥэргэ былыргы “Халыма” трассата ааһар сиринэн эбии “резервэҕэ” дэнэр лиинийэни тардыахпыт. Оччотугар бу лиинийэ Уус-Ньараҕа диэри тиийдэҕинэ, улуус киинигэр сибээс араас хайысханан – Магадаанынан, Дьокуускайынан уонна урукку трассанан кэлэр буолуоҕа.

Төрүт нэһилиэгэр атырдьах ыйыгар оптоволокно лиинийэтин тардыбыппыт. Онно социальнай эбийиэктэргэ интэриниэти киллэрбиппит. Балтараа-икки нэдиэлэнэн интэриниэккэ аны ким баҕалаах нэһилиэк олохтоохторун холбуохпут. Бастакы тымныы түһүөр диэри Төрүт нэһилиэгэ оптоволокноҕа бүтүннүү холбонуоҕа.

Ыраах сытар нэһилиэктэргэ оптоволокнону холбооһун “Российскай Федерация цифровой экономиката” национальнай бырагыраама чэрчитинэн ыытыллар, — диэн түбүктээх үлэтин сырдатта эппиэттээх үлэлээх салайааччы.

Елена ПОТОЦКАЯ, «Саха сирэ» хаһыат.