Өймөкөөннөр Москваҕа уонна Болгарияҕа ыҥырыы туттулар

Ааптар: 
Бөлөххө киир:

Бу күннэргэ Мэҥэ Хаҥалас улууһун Майа бөһүөлэгэр Норуоттар икки ардыларынааҕы  «Олоҥхо сирэ ыҥырар» IV норуоттар икки ардыларынааҕы фольклорнай бэстибээл буолан ааста.

edersaas.ru

Онно  Афганистан, Киргизия, Соҕуруу Кэриэйэ курдук омук сирдэриттэн, Мэҥэ Хаҥалас, Амма, Анаабыр, Өймөкөөн, Таатта, Чурапчы, Уус Алдан, Нам  улуустарыттан  кэлэн кыттыыны ыллылар.

Өймөкөөн улууһуттан Томтордооҕу Оҕо искусствотын оскуолатын уһуйааччылара  Ньургуйаана  Дьячкова уонна Оксана Дягилева салайар фольклорнай  уонна муода тыйаатырын салайар бөлөхтөрө кыттыыны ылан, кэккэ номинацияларга ситиһиилэннилэр.

Барыта 300-чэкэ кыттааччыттан өймөкөөннөр бары номинацияларга миэстэстэлэстилэр.

Онон айар куттаах кэллиэгэлэрбит ситиһиилэриттэн олус үөрдүбүт, — диэн санаатын үллэстэр Томтордооҕу Оҕо искусствотын оскуолатын хореографияҕа педагога Варвара Мосорина.  

Бэстибээлгэ Муода тыйаатырын бэлэмнээбит Оксана Дягилева Мэҥэ Хаҥаластан төрүттээх Өймөкөөн кийиитэ, Томтору иккис дойду оҥостон олорор.

Кини бэстибээлгэ хайдах бэлэмнэммиттэрин бу курдук кэпсиир:

Томтордооҕу Оҕо искусствотын оскуолатын дириэктэрэ Галина Петрова оҕо айар талаана сайдыытыгар туһуламмыт үлэни сатабыллаахтык тэрийэр. Салайааччыбыт иистэнэр таҥаспыт матырыйаалын куораттан сакаастыыр. Тымныы полюһугар олорор дьон буоларбыт быһыытынан сүрүн тиэмэбит — кыһыҥҥы тиэмэ.  Ол да иһин буолуо, атыттарга майгыннаабаппыт, ураты көстүүлээхпит. Нэһилиэкпит баһылыга Никифор Протопопов биһигини өрүү өйүүр. Холобура, «Муус хайа» көстүүммүтүн олохтоох дьаһалта үбүлээн тиктибиппит. «Дьүкээбил» уонна «Хаар кыыһа» көстүүмнэрбитин дириэктэрбит Галина Петрова сакаастаабыт таҥастарынан тиктибиппит. Араас тэрээһиннэргэ кыттаары түүннэри-күнүстэри тиктибит көстүүмнэрбитин биир-икки эрэ тэрээһииҥҥэ буолбакка,  араас ис хоһоонноох култуурунай тэрээһиннэргэ кыттан, үлэбит түмүгүн дьэ көрдөрөн  эрэбит.

«Олоҥхо сирэ ыҥырар» бэстибээл түмүгүнэн  Муода тыйаатырын оҕолорун бөлөҕө иккис истиэпэннээх лауреат аатын ылан, атырдьах ыйыгар  Москваҕа ыытыллар «Доҕотторуҥ Москваҕа» Норуоттар икки ардыларынааҕы муусука уонна үҥкүү III   бэстибээлигэр кыттарга ыҥырыы ылла. Оттон улахан дьон лауреат иккис истиэннээх лауреат буолан, атырдьах ыйын бүтүүгэр Болгарияҕа Норуоттар икки ардыларынааҕы фольклорнай бэстибээлгэ ыҥырыы туттулар.

Ити курдук, Тымныы полюһугар ситиһиилээхтик үлэлиир Томтордооҕу  Оҕо искусствотын оскуолатын педагогтара араас таһымнаах бэстибээллэргэ кыттыахтарын эрэ кэрэх, өрүү миэстэлэһэллэр. Айар куттаах уһуйааччылар бу курдук өрүү ситиһиилээх буолалларыгар баҕарабыт.

Елена ПОТОЦКАЯ, «Саха сирэ» хаһыат, edersaas.ru

Хаартыска  батсааптан.

+1
0
+1
0
+1
0
+1
0
+1
0
+1
0
+1
0